Sikul kal turin an raltlan

Myanmar an buai a, mi engemaw zat an tlanchhe mek. An zingah hian lehkha zir tura tlanchhia pawh an awm.
Thu dawn danin, Myanmar hi an buai avangin zirna pawh a nghawng nasa a, sikul an kal theih loh vanga Mizorama lut, Mizorama sikul kal tuma tlanchhia te pawh an awm.
Champhai District-a Farkawn-ah chutiang chu an awm a, HSLC result nghak mek pawh an awm.
Farkawnah hian high school naupang, Myanmar atanga tlanchhiaah pawh lehkha zir tur ngawr ngawra tlanchhia pali an awm mek.
Raltlan naupang, Mizorama zirna chhunzawm ta ni lo, sikul lut tur liau liauva Mizorama tlanchhia zirlai palite hi mipa pathum leh hmeichhia pakhat an ni a, unau pawh an awm; unau hi mipa leh hmeichhia an ni.
Anni pali hi Farkawn atanga hla vak lo atanga kal an ni a, mahni khua chhuahsanin Farkawnah hian an awm mek. Lehkha zir duh tak tak an ni bawk a, an taimain rilru an nei hle tih thu dawn a ni.
“An thiam, thiam pangngai an ni a, zirtir pawh an nuam. English-ah an chak lo deuh a, a bak chu an thiam,” an zirtirtu pakhat chuan a ti.
“An zir taima. Zir duh tak tak an ni bawk a, an taima a, fuih an ngai lo,” a ti a, “Thu an awih a, an discipline pawh a tha,” a ti bawk.
Hmun dangah pawh chutiang chi, an khua a ralmuan loh avanga lehkha zir thei lo, zir tura Mizorama lut hi an awm a, tam chu an ni lo.