Hmasawnna bung thar…

Land Revenue & Settlement Minister Lalruatkima chuan nimin khan Phulpui leh Tachhip-ah Property Card a sem chhuak a. Hei hi Mizoramah a hmasa ber a ni mai lo va; India hmarchhak state pariat zinga Property Card sem chhuak thei hmasa ber nihna a ni nghal bawk. Hei hi Mizoram tana hmasawnna bungthar kaina a ni a, a lawmawm hle.
Property Card siam hi ‘Survey of Villages Abadi and Mapping with Improvised Technology in Village Areas (SVAMITVA) Scheme hnuaia kalpui niin, drone hmangin thingtlang khuaa mihring chenna hmunte thlalak a ni a, thlalak hmang hian Property Card siam a ni a, LSC changkang tak a ni ber a. Hei hian ramri chungchanga buaina a tihtlem bakah khaw hmunhma ruahman leh loan lak te pawh a tiawlsam sawt dawn nia sawi a ni.
Tun dinhmunah Mizoram khua 319-ah he scheme hi kalpui tura ruahman niin, tunah hian khaw 171-ah te drone hmanga thlalak tan a ni tawh a, bultanna a la rei loh ngaihtuahin an thawk chak a, thawktute an fakawm hle.
Tun lai khawvel thiamna hmangin tih dan thar, rang zawk leh tha zawk a lo chhuak zel a. Tunhmaa tui bill, electric bill etc. pe tura intlar put ang kha hmuh tur a awm tawh lo va, mahni in lum atangin online-in awlsam takin a pek theih tawh a. Awlsam zawka mipui ten chhiah an pek theihna tur ‘Computerise online payment of taxes’ pawh hman theih mai tura chhawpchhuah tep tawh nia sawi a ni a. Eirawngbawlna gas pawh online hmanga order theih tura ruahmanna kalpui mek a ni bawk a.
Tunhma kum 40 vel liam taa kan khawsak phung leh tuna kan dinhmun hi chu lei leh van ang maia inthlau a ni tawh a, hmasawnna bung thar hi kan keu mawlh mawlh reng ta mai niin a lang. Hetih rual erawh chuan, hmasawnna bung thar kai kan tumna lama mihring mamawh bulpui heng environment tihchhiat nasat avanga boruak leh tui lo bawlhhlawh chho ta zel erawh, hmathlir thui tak nei chunga kan vei a pawimawh ta khawp mai.