Hmasawnna thleng turah mipui inbuatsaih a tul – MBJP vice president

Hmasawnna thleng turah
mipui inbuatsaih a tul
– MBJP vice president
Sawrkar laipuiin hmasawnna tam tak a rawn luanluh tir mekah tluang taka a kal theihnan Mizoram mipui kan lo inbuatsaih that a tul tih BJP Mizoram hruaitu Vanupa Zathang chuan a sawi.
Thawhtannia BJP Mizoram office-a inkhawmah State vice president Vanupa Zathang chuan, central atanga development lo thleng tur dawl zo turin Mizoram sawrkar leh mipui kan inbuatsaih that a pawimawh a, hmasawnna tluang taka a kal theihnan a dodal zawng ni loa, a thawhpui zawnga kan inbuatsaih a pawimawh tih a sawi.
Sawrkar laipui hmalaknaa rela Aizawl kalpawh theih tawh chu a hma atang daiha hriat lawk a ni chungin, state sawrkar erawh duhthusamin a inbuatsaih tha tawk lo em, tih theih a ni tih a sawi. “ILP pawh online kher loa, rel station-a duty tur indaih tawk kan dah theih loh chuan hun reilote ah buaina kan tawk mai ang tih a hlauhawm hle. Tourist tam takin Mizoram min rawn tlawh mek a, kawng zau tak a inhawn avang hian kan fimkhur erawh a ngai a ni,” a ti.
Aizawl khawpui enkawltu tur thlan turah a hun taka kan inthlan theih dawn loh laiin, village council inthlan erawh a hun aia hmaa neih a ni thung si tih State BJP hruaitu hian a sawi a. Hei hian sawrkar laiten anmahni chauh inngaihtuah a, an thuneihna chu an hamthatna atan chauha hmang an ni mai em, tih mipuiah zawhna lian tak a awm thei tih a sawi.
AMC inthlan tur chu Mizoram hmalam hun thui tak hril theitu a ni tih a sawi a. BJP pawhin candidate tha tak tak an nei anga, AMC changtlung zawk leh AMC huamchhunga mipui chhawk zangkhai zawnga hma lak a nih theihnan Aizawl mipuiin rilru seng turin an ngen tih a sawi.
“BJP chuan Aizawl khawpui develop-na tur sum mipuia innghat loa, central-a kan hotuten min lo tiam tawh thin anga AMC atana Special Fund kan hmuh theih chuan mipui tan zangkhaina leh hmasawnna tha tak a nih a rinawm,” a ti.