Hmeichhe himna leh chawikan lama thawh tawh dan thlirlet

Hmeichhe himna leh chawikan
lama thawh tawh dan thlirlet
Women & Child Development hnuaia Mission Shakti (Safety, Security & Empowerment of Women) – hmeichhiate venhim, humhim leh chawikanna programme kalpui mekah ni thum awh tur Annual Review Meet cum Training chu Ningani khan Aizawlah neih tan a ni.
Nilaini khan Women & Child Development director Zoramthangi Chhangte hoin district tina officer-te nen hmalak tawhna thlirletin hriat tur inzirtir a ni a. Ningani khan Mission Shakti hnuaia thawktu district zawng zawng ami nen neih leh niin, vawiin – Zirtawpni thleng neih a ni ang.
Kum kaltaa hnathawh dan thlirlet bakah hmalak zel dan tur sawiho a ni a. Hmeichhiate venhim, humhim leh chawikan kawnga hma sawn turin training hi buatsaih a ni.
Hemi rual hian Poshan Pakhwada (Nutrition Fortnight) April 9-23 chhung awh tur chu WCD director hian a hawng nghal a. Poshan Pakhwada hman dan tur sawifiahin, Mizoram mai nilo, India ram puma hman tur a ni tih a sawi.