Hmeichhe hlimna i siam chuan nang pawh i hlim ang

Nupui i nei tawh em? A nih loh leh ngaihzawng pawh? Chutiang chu i nei a nih chuan tuna kan sawi tur te hi hre reng la, han tichhin la, i kawppui hlimna i siam ang a, i kawppui i tihhlim phawt chuan nang pawh i hlim dawn tih hre reng ang che.
Kan chanchin a tha zawnga miin an sawi hian ngaihthlak nuam kan ti thin. Min fak fo tute chu huat viau pawh tum ila kan haw tak tak thei ngai lo. I nupui/ngaihzawng chu fakna tur i hriat phawt chuan fak mai rawh. Infak tur kan tih rualin awm lo lutuka infak vak erawhin a ni lo zawngin boruak a her daih thei. Fakna âwm hi a awm a, chutiang huna infak chu a ni kan sawi.
Hmeichhia te hian thil an hre rei thei khawp mai, an ti a, chuvangin i vawikhat thil tih that leh vawi hlimna i siam sak kha a theihnghilh tawh mai mai dawn lo a nia.
Hmeichhia chu a hna tul-ah “Ka lo tihpui ang che chu!” i ti tawh ngai em. Chutiangin in chhung sekrek khawih leh in chhung tihfai velah te pawh. I peih lo viau a nih pawhin tawngkam tha talin han ti chhin reng reng teh. A hlawkna têltu tur chu nangmah tho kha i nia!
Hmeichhia chu i tana a hlutzia te hrilh fo rawh. Mipa tam takin kan tan an hlu ti chu sawi kher ngai lo turah te ngai thin a, thil reng reng ngaia neih a, ni ve tur rêng angah ngaih chin te kan nei thin. Chutiang tur a ni lo, i hmangaih thu te, i ngaihzia te leh i tana a hlutzia te chu hrilh fo rawh.
Mipa te chu nupui neih hnuah pawh kan pawn chhuak tam a, kan lengvak nasa. Hmeichhia te chu ina tawm deuh chawt turah te kan ngai a, an tawm reng bawk a. Hetiang a nih vang tak hian hmeichhia chu ‘surprise’ ve zeuh zeuh tur a ni.
‘Surprise’ tur tih vanga engemaw deuh tak ngaihtuah chiam kher a tul chuang lo. |hiante ina han len pui emaw, bazar-a teihawi pui mai mai te, a hriat loh laia tlailam eirawng lo bawl khalh te, present (thil tha deuh a ngai kher lo) han pek zauh te. Tih tur a tam thei viau awm e.
Tih tur kan sawi rualin, tih loh tur pakhat sawi tel lawk ila, hmeichhia chuan hmeichhe dang nena khaikhin a ngaithei lo hle tih hriat reng tur. I ‘ex’ nen phei chuan a tha zawng pawha tehkhin loh a fuh zawng ang.