Hmeichhe tana mipa duhthusam nih theih dan

Hmeichhe tana mipa duhthusam nih theih dan
‘Perfect man’ nih i duh em? Hmeichhia te hi tihlawm an har an ti teh chawk a, mahse, chutiang a ni lem lo. A thinlungah kha han ‘target’ chat mai la, chumi i hneh tawh chuan a harsa lem lo tih i hre mai ang.
Mipa tam takin hmeichhia te chu thilpek hmanga tihlawm chiah an ngai a, a dik viau, mahse, chu ai pawha pawimawh zawk, hautak bawk si lo chu a awm niin relationship lama mithiam ten an sawi.
Hmeichhe rilru leh thinlung hneh tura step hmasa ber chu a nihna anga pawm thiam a, amah hriatchian hi a ni. Hmeichhia te chuan an rilru puthmang te hi indirect-a tihlan an ching a, mipa erawhin ‘direct’-in an tilang pawp mai thin. Chumi pahnih chu buai lova a intawh khawm dan i ngaihtuah chhuah thiam chuan ‘perfect man’ nih i hlat lo.
Hmeichhia nena in inzawmna thuk lehzuala siam dan kawng hrang hrang a, relationship lama mithiam ten kawng thenkhat an sawi te kan rawn tarlang e.
1. Hmeichhia ten mipa lak atangin himna an duh. Mahse, chutiang a nih vangin mipa chu sek phiar teng tung a ni tur tihna lam a ni lo. Mahni thua ding nghet, ti zek-zuk ni lo lam sawina a ni zawk.
2. Hmelthatna hi a hlu, mahse, chu chu a pawimawh ber lo. Mahni inring tawk, harsatna pawh paltlang thei tura an rin te hian hmeichhia an hip zawk tlat.
3. Hmeichhia chuan a rinngam mipa a duh a, chu chu a leia lei chi a ni lo, hlawhchhuah chi a ni. A tana rinngam i ni tih a hriat theih nan chuan tihhreh nei lem suh.
4. Hmeichhia chu zahthiam la, chawimawi thiam rawh, chutiang mi bula awm chu nuam an ti.
5. I rilru leh ngaihtuahna te hrilh fo rawh, chutiang chu hmeichhe tih turah dah bik ngawt suh. I chetzia bakah i tawngka ngeiin i tilang thin dawn nia. Entir nan- a kawr thar inhmeh i tih thu te, a sam thar nalh i tih thu te. Chutiang hi a zawh kher che ngai loin sawi ve mai rawh.
6. Hmangaih a phu a, chutiang ngei chuan i hmangaihna ti lang thin ang che- chetzia leh tawngkain.