Hmeichhe zinga dead hang thei upa ber

Hmeichhe zinga dead hang thei upa ber
Dead hang an tih chu chunglama bar khamah an uai a, ke lei si lovin, ban tingilin an uai zawi hnak a, chutiang chuan an theih anga rei uai an tum thin. Pitar kum 90 mi, Ann Crile Esselstyn chu Guinness World Record-in hmeichhe zinga dead hang ti thei upa berah a puang.
Ann hi naupan lai atanga harh tha tak, infiammi tak mai a ni a, sports chi hrang 10 zetah a khelin, coach-ah a tang tawh a, a hriselin, a in-fit hle reng mai a, a tu leh fate pawh taksa sawizawi tha tura fuihtu ber niin, an tu leh fate zingah state championships vela gold medal dawng te pawhan kat nawk tawh bawk.
Tichuan, March ni 6 khan dead hang hi tiin, record a siam ta a, kum 90 leh ni 231 a upa niin, minute hnih leh second 52 chhung dead hang a la ti thei a, 2024-ah kum 81 mi, Annie Judis record a rawn khum ta a ni.
Ann chuan, “Record siam lam chu ka la tihngai loh, ka tana thil thar a ni a, hetiang zawnga hlawhtlinna neih hi ka fa pali leh tu 10 te infiamna chi hrang hranga fuihtu leh an hlawhtlinnate lawmpui thintu ka nih avangin a hlu hle a ni. Kum 90 chhung hian tum bik neia training a, support-na tha tak dawng a, kum 90 mi ni a Guinness World Records title dawn hi ka ngaihtuahnaah pawh la awm ngai lo a ni,” a ti.
Ann hian February thla khan record siam tumna hi a nei chauh a, a chhungten an phurpui nghal hle a, thla khat vel a inpuahchah hnuah record a siam ta mai a ni.
Taksa hriselna leh fitness ngaipawimawh mi a ni a, a posture siam nan bar-a uai hi a ti zauh zauh a, a fapa Rip-a’n record siam hi a sawi hmuh ta a ni. Rip hian fitness challenge ‘Hanging with Rip’ tih a kalpui a, chutah chuan Ann hi tel vein, pull up bar a a rei thei ang ber uai tum chu a ti ve ta a, “Kan tih hmasak bera minute khat leh second 15 ka ti thei a. Rip chu a phur ta hle mai a, Annie Judis record te sawiin, record khum tumin an inpuahchah ta a ni. Training mumal pawh awm lo a minute khat leh second 15 ka tih nghal mai theih avang khan a phur riau a ni,” a ti.
Tichuan Rip chu a coach a ni ta a, February ni 2 atang khan nitin dead hang chu an ti ta a, thla khat vel an inpuahchah hnua tuk khat chu minute 2 leh second 16 a dead hang thei ta a, chutah chuan record siam thei dinhmunah a ding tih an hre ta a ni.
Tichuan, record siam tumin an bei ta a, a vawi khatnaah Ann chuan minute hnih leh second 41 a dead hang ta mai a, mahse, a record siam tih inhria phur lutuk chuan a ke a lo leng deuh a, a ke then chu an disqualift phah hlauin, minute 30 vel chawlin an titha leh ta a, minute hnih leh second 30 a pel a, a tawiawmtute thawm a tha ta hle a, “An lawm au thawm atangin a vawi khat ai pawhin ka lo tirei zawk tih ka hre ta a ni,” a ti.