Hmeichhia-in a duh tak tak che nge a tikual vel mai mai che?

Khaile harhchhuah a hun ta. A fuh dawn viauin a lang a, mahse, atak ram a thleng ngai lo. Hun a kal a, i bialnu ni a i ngaih chuan a chhaih mai mai che a, a hmang mai mai che niin i hre deuh em, nang engmah i dawng ve si lo.
Hmeichhia ten an duh ve tak tak pawh ni lem lo mipain a duh tih an hriat avanga an duh zawng tih sak tur leh an lunglen hnema hman mai mai ching an awm a, chu chu mipa tan chuan nunrawnna theih tawp a tling. Chutiang dinhmunah chuan i ding em? I ding a nih chuan i nat tak tak hmain inchhanhim rawh. Kalsan la, hawi kir leh tawh. Mahse, engtin nge i dinhmun chu i hriat theih ang? Chhiar rawh le.
Hmeichhiain a reh deuh vang vang hnuah a rawn be thar leh che a, inhmuh te a rawt, atan eng emaw tihsak turin a duh che a. A nawr hlat che a, a ngaihsak loh deuh che apiangin i hmangaih hle niin i inhre telh telh a. A mamawh che apiangin a be tha leh hawrh ang che. Chutiang hmeichhia chuan a hmang mai mai che a ni, i hmangaihna chu a phu mawlh lo e.
An ina leng tur te pawhin a sawm ve thin che, chutiang hunah chuan lawm takin i kal duan duan a, a lo lawm der vel viau ang che. A ril a tam deuh leh ei tur ken sak turin a chah che ang a, a tui tha tha i ken sak ang a, mark i hmuh san te pawh i beisei. Chutianga a mamawh i tih sak chuan i hlim a, nuam i ti, mahse, nangin a hnen atangin engmah i dawng lo. I lak atangin a awm hla thiam leh tlat si. Mi â te ramah i cheng mek. A uite ang chauh i ni. Harh chhuak rawh.
Hmeichhiain a duh duh tih kual vel mai mai atan a duh tawk lek che a nih chuan a thiante pawh i tawng khat khawp ang. I bula awm ai chuan a thiante bula awm pawh a thlang zawk thin ang. Party-naah a sawm ve che a nih pawhin a ngaihsak vak lo ang che, nang lahin hmelhriat dang i nei vak si lo ang. Mahse, hei hi mipa ten an theihnghilh leh awlsam viau si. Hmeichhiain a duh tak tak che a nih chuan a thiante nen a inhmelhriattir zung zung ang che.
A chanchin a sawi reng a, a harsatna leh a thil tawn chanchin te i ngaithla deuh reng thin em? A ngaihzawng hlui sual zia te a hrilh che em? Nangin eng emaw i hrilh ve dawnin a lo pawt chat zung zung che em? Harsatna i sawi ve pawhin, hriatthiam pui che a tawrhpui che aiin, ‘Pa’ takin awm rawh, a ti leh hlauh zawk si che em. I natna te chuan amahah engmah nghawng a nei lo em?
A chunga kan tarlan hrang hrang te zinga pakhat pawh hi i channa chu ‘Yes’ a nih chuan, “Mangtha mai le,” tih a hun e.