Hmeichhia vangin mipa rilru tibuai!

Mithiam ten zirchianna an neih tharah chuan mipa ten hmechhia an vang (scarce) ni a an hriat vangin ngaihtuah fim taka hman an harsat a, an inkhawl theih loh phah a, mi ta puk pawh an hreh loh phah niin an sawi.
University of Minnesota-a Carlson School of Management-a mithiam ten sex ratio (mipa leh hmeichhe tam lam inthlauhna) hian sum leh pai lama mipa thutlukna a nghawng hle niin an sawi a ni.
Zirchiannaa an hotu Vladas Griskevicius chuan, “Nungcha dangah pawh hei hi a dik khawp mai, a nu (female) an tlem chuan a pa (male) teinkarah a nu inchuhna a nasa thin.
“A nih leh mihringin engtin he a kawppui tur an inchuh ve thin? Kan hmanraw tlanglawn tak chu sum leh nihna (status) te a ni,” a ti.
Zirchianna neitu te hian khaw hrang hrang, mipa tam zawkna leh hmeichhe tam zawknaa mi cheng te chu an hlawh atanga an inkhawl theih dan leh an sum puk dan te an sum hman dante an teh a. Chuta tanga an hmuh dan chuan hmeichhe tlemna hmunah chuan mipa ten sum an khawl thei lo zawk zel a, hmeichhia aia mipa tam zawkna hmuna awm mipa te chuan hmeichhia aia mipa tlem zawkna hmuna mipa te aiin 42% in inkhawl an harsat zawk niin an sawi a, 84%-in sum puk an hreh lo zawk niin an sawi bawk.
Hei bakah hian participant-te chu thlalak hrang hrang, mipa tamzawkna leh hmeichhe tam zawkna te entir an ni a. Thlalak an en zawh hnuah pawisa dawn nghal nge an duh, thlakhat hnuah tuna an dawn tura aia tam dawn, tih te an zawt leh a.
Thlalak a hmeichhe tlem zawkna an en chuan thlakhat hnuah dollar 30 dawn aiin tuna dollar 20 dawn nghal an duh zawk.
Griskevicius chuan, “Sex ratio-in an duhthlanna leh nungchang a nghawng tih an hre miah lo. Economics chuan mihring ten uluk taka ngaihtuahin fimkhur takin duh kan thlang thin a, ran te ang kan ni lo, an ti thin. Mahse, ran nen hian inanna tam tak kan nei. Kan chheh velah hmeichhia aiin mipa kan tam zawk tih hriat ringawtin automatic-in kan khawsak phung min tlak sak nghal mai a ni,” a ti.
He zirchianna chungchang hi Journal of Personality ans Social Psychology-ah tarlan a ni.