Hmeichhiate humhimna lama hriat tur tul inhrilhhriat bul tan

Hmeichhiate dinhmun chawikanna tura sawrkar laipui ruahmanna pahnih – Mission Shakti leh Beti Bachao Beti Padhao (BBBP) tih hlawhtlinna atana a kaihhnawih sawrkar department ho hriat tur tul inhrilhtharna chu Zirtawpni khan Women & Child Development department buatsaihin hman a ni.
Hei hi sawrkar laipui ruahmanna veka SANKALP-HEW hnuaia ni 100 chhung a hnre turte hnena hrilhhriat a nih theihna atana bul tanna a ni a. Hmanpuitu Health & Family Welfare minister Lalrinpuii chuan Mission Shakti leh BBBP chu sawrkar laipuiin hmeichhia harsatna tawkte tanpui leh an dinhmun chawikan a, hmeichhe naupangte humhim leh zirna pek a nih theih nana a ruahman a ni tih a sawi.
Sawrkar laipuia ministry-in a beisei angin, department hrang hrang thawhhona a pawimawh zia hriat tlan a pawimawh, tiin, program tihlawhtling tura thawhhona tha neih a tul tih a sawi. Mizoramah chuan, state danga harsatna an tawh ang em em tawk lo mah ila, hmeichhia leh mipate angkhata en harsa kan la tih thu sawiin, “Kohhran, politics leh khawtlang rorelnaah tunhma ai chuan hma kan sawn tawh viau na in, hmasawnna tur erawh kan la ngah hle a ni,” Lalrinpuii hian a ti.
Mission Shakti hnuaiah hian Mizorama district 8-ah One Stop Centre siam niin, hmeichhia thlabar leh harsatna tawkte mikhual nana hman a ni. District thar pathuma OSC din turin ruahman mek a ni bawk. Hei bakah hian hmeichhia leh naupangten phone hmanga an harsatna an thlen theihna tur ‘helpline’ siam a ni a. OSC leh helpline ah hian domestic violence (kawppui/ chenpuite kut tuar) avanga a puihna dil an tam ber a ni. Heng bakah hian Shakti Sadan (Integrated Relief & Rehabilitation Home) leh hamthatna dangte din a ni.