Indian Council of Medical Research (IMCR) te chuan Karnataka ah Human Metapneumovirus (HMPV) kaitu pahnih an hmuhchhuah thu an puang a. Heng mite hi routine surveillance neihna atanga an hmuhchhuah niin ICMR in ram pum huapa respiratory illness a enfiahna kalzel hmanga hmuhchhuah an ni.
HMPV veitu pahnih te hi nausen niin bronchopneumonia nei te an ni bawk a, Bengaluru a Baptist Hospital a inenkawl te an ni. An pahjnih hain China ah HMPV case a hluar tia sawi a nih hnua ram chhunga HMPV vei hmuhchhuah hmasak ber an ni.
Nausen pakhat zawk hmeichhe sen thla thuma upa chu dam tha tawhin damdawiin a chhuahsan tawh a, HMPV kaitu dang thla riata upa mipa sen chu January 3 khan HMPV a kai tih hria in tunah thatlam a pan mek bawk.
Union Health Ministry official te chuan nausen pahnih te hi zin chhuak an ni lo a ti bawk a, chutiang bawkin an nu le pa te pawh ram pawna zinchhuak an awm lo a ti bawk a. Union Health Ministry chuan surveilance channel an neih tinte hmangin uluk takin thil a thlithlai mek reng tiin thuchhuah an siamah an tarlang bawk.
“HMPV hi khawvel huapin India pawh telin a darh a, respiratory illness HMPV kaihhnawih chu ram hrang hrang vei hriat an ni. ICMR leh Integrated Disease Surveillance Programme (IDSP) network te hmangin ram chhungah Influenza-Like Illness (ILI) emaw Severe Acute Respiratory Illness (SARI) case a hluar hriat a ni lo” tiin tarlan ani bawk.
-- Advertisement --
HMPV hi natna mak danglam a ni lo
China ah HMPV a leng darh nasa tia sawi a nih hnuah Hyderabad a inbun paeditrician chuan HMPV chu natna thar emaw danglam bik a ni lo tiin a sawi.
“HMPV hi virus mak danglam a ni lo. Kum tina kan hmuh niin a tlangpuiin July emaw August atanga December leh January thlenga kan hriat hran a ni” tiin paeditrician Sivaranjani Santosh chuan a sawi a. He virus hi khuh, khawsik, hritlang te thlenin a nasat deuhnaah chuan oxygen emaw ventilation te pawh a ngaitheia chu erawh thil thleng khat tak a ni a ti bawk.
HMPV antiviral treatment bik a la awm loh avangin symptomatic care chu thlubring a ni thin tia saw bawkin Dr. Santosh chuan mipuite chu tul lova hlauhlawpa awm lo turin a ngen bawk a.
Paeditrician chuan thlasik laia respiratory virus heng Influenza, RSV leh Adenovirus te an len duh lai chuan fimkhur a ngaih thu sawiin nu leh pa te chu an fate damlo chungin school kaltir lo turin a ngen bawk a.
“In fa tena an lak nat loh em em kha midang te tan chuan hlauhawm tak a ni thei” tiin Dr. Santosh chuan a sawi bawk a. A tul anga hmaituamna hman te, kutsil that te ang chu kalpui tur a ti bawk.
Prabhukumar Challagali, president of the Indian Medical Association (IMA) Banjara Hills pawhin Human Metapneumovirus (HMPV) chuan hritlang khawsik thlengin a bik takin kum upa leh naupang ten thlasik laiin an la hma thin a ti bawk a. “Tun dinhmunah respiratory infection te thununin an awm a, mahse, fimkhur tho tur a ni” tiin a sawi bawk a.
Dr. Challagali chuan mahnia damdawi inchawh mai lova symptom nei nia inhriat chuan doctor rawn turin ngenna a siam bawk.