Tamil Nadu Governor R.N. Ravi chuan Thawhtan (January 6, 2025) khan State Assembly session neihnaah tihthin dan anga House a thusawina neih thin nei lovin a chhuahsan.
Ravi an thusawina nei lova a chhuahsan nachhan hi State anthem “Tamil Thai Vazhthu” hnua national anthem play a nih loh vang a ni a. National anthem chu play ngei turin a tia mahse an play duh lo a ni.
-- Advertisement --
Tihthin dan
Leader of the House Duraimurugan mai bakah Transport Minister S.S. Sivasankar te chuan tihthin dan ang chuan Govern’s address tan dawnah Tamil Thai Vaazhthu chu play tur a ni a, a tawp lamah national anthem play thin a ni a ti a. Sepaker office pawhin Governor hnenah a hrilhfiah chiang ani an ti.
Raj Bhavan chhanna
Raj Bhavan chuan X a thuchhuah an siam zuiah, “Constitution of Bharat leh National Anthem te chu vawiinah Tamil Nadu Assembly ah hmuhsitin a awm leh ta a ni. National Anthem zah hi kan Constitution in Fundamental Duty a ngaih pawimawh hmasak a ni a. Governor address dawnah leh zawh hnuah state legislature tinah sak thin a ni” tiin a tarlang.
“Vawiinah House a Governor a thlen hnu in Tamil Thaai Vaazhthu chauh sak a ni a. Governor chuan House chu an constitutional duty hrilhin Hon’ble Chief Minister, Leader of the House leh Hon’ble Speaker te chu National Anthem sak a nih theih nan a ngen a. Mahse, an hnawlsak a ni” tiin thuchhuah chuan a sawi bawk.
Thil thleng chu ngaihmawhawm tak zet a ni a ti bawk a. “Constitution leh Nationla Anthem zahlohna huaisar langsar taka tel ve duh lovin Governor chuan hrehawm ti takin house a chhuahsan a ni” tiin tarlan a ni bawk.
Governor Ravi chu House chhhungah minute thum pawh a awm hman lo va. Governor’s speech chu Speaker M. Appavu an a chhiar ta a ni.
Governor in House a chhuahsan hnuah Opposition AIADMK te chuan Anna University a zirlai mipat hmeichhiatna kawnga mawi lo taka khawih in justice a hmuh theih nan placard kengin an au bawk a.
Congress member te erawh Governor chetdan duh lovin House an chhuahsan thung.
Nikum February thla pawh khan Assembly Session nikhatnaah Governor chuan tihthin dan anga inaugural address chhiar duh tawh lovin House a lo chhuahsan tawh bawk.
January 2023 pawh khan Chief Minister in House a Governor address a a duhlai chauh thlanga a chhiar a duhloh thu a sawi avangin Governor Ravi chuan Assembly a chhuahsan rum rum tawh bawk.