Hmun hnihah heroin man

Zokhawthar Police chuan heroin leh methamphetamine an man a. Serchhip Excise &Narcotics pawhin heroin an man.
Zokhawthar Police Station team chuan September 2 zan dar 10.25 vel khan New Hruaikawn daiah operation neiin lirthei pakhat, Bolero MZ01 AA 3824, Bulfekzawl atanga Champhai lam pan chu rinhlelh thilah lo tidingin, ngun taka lirthei an dap hnuah heroin nia hriat kg 2.557 a rit (hawng 220) leh methamphetamine nia hriat kg 5.742 a rit (mum 50500) an man a, a kawltu David Rosangliana (30) leh Lawmsangzuala (27) Bulfekzawl khua ve ve nia inchhalte pawh man niin, Zokhawthar Police Station-ah thubuai ziahluh a ni.
September 3 khan Laldampuia (27) Bungtlang Serchhip district nia inchhal, tuna Serchhip Field Veng awm mek kut atangin Serchhip Excise &Narcotics duty chuan heroin gram 11.08 an man sak a, hemi ni vek hian Buangpui khuaah Isak Lalawmpuia (28), Lunglei Rahsi Veng kut atangin heroin gram 79.05 (hawng 8) an man bawk a, thubuai siamsak an ni.