January 29 khan Seling leh Bilkhawthlirah kuhva ro, dan loa tawlhruk man a ni.
-- Advertisement --
Mizoram Police Seling Outpost-a duty-te chuan Pathianni tlai khan lirthei pathum, Lalramchhana (50), Rualthankhuma (30) leh C Lalduhsaka (22), Champhai Zotlang nia inchhalte khalh atangin kuhva ro bag 83 (kg. 6640 vel), dan loa Myanmar atanga lakluh an phurh chu an man. An thil mante hi Aizawla phurh thlen tum nia hriat a ni.
Bilkhawthlir Kuhva Chingtu Pawl pawhin Pathianni zan dar 8.00 vel khan Vairengte lam atanga Bilkhawthlir pana tlan truck ke 12 nei pahnih – NL02 L 3795 leh NL01 K 7475 atangin Myanmar atanga dan loa lakluh nia hriat kuhva ro engemawzat an man. Heng truck driver awmna hnung lam, truck body chhungah pindan siamin hetah hian kuhva hi dahna hranpa siam tawh looin an phur nia thu dawn a ni a. Truck body hnung lam atanga en chuan a ruak emaw tih theih tura duan a ni.
Thu zawhchiannaah kuhva neitu hi Vanlalruati nia sawi a ni a, driver te hi Lalchhanhima leh Peter Lalnghakchhunga, Vairengte IOC Veng vek niin an insawi.
Bilkhawthlir Kuhva Chingtu Pawl hian nikum December 14 atanga dan loa tawlh Myanmar atanga kuhva rah lakluh veng hian an duty tan a, engemawzat an man tawh. Tunhnaia an man hi Vairengte leh a chhehvel kudam atanga Bilkhawthlir lama phurh chhoh an ni tlangpui tih an sawi.