Hmun hrang hrangah kawng chhiat vanga harsatna

Kawng chhiat vanga harsatna chungchang hi titi a tling deuh reng a, a nasat zual lai leh a zia deuh lai a awm tih a ni deuh mai. He harsatna hi tunlaiin a zual leh a, a thawm pawh a ring leh tan.
Kolasib leh Bairabi inkar kawng chhiat thu leh harsatna a thlen thu hi thu thar a ni lo a, mahse tun hnaiah a zual; khualzin phur lirthei an chawl mek.
Thu dawn danin, zero point leh Pangbalkawn inkar kawng a chhiat em avangin khualzin phur lirtheite’n harsatna an tawk nasa a, Bairabi leh Kolasib inkara tlan maxi cab leh bus te, Bairabi leh Aizawl inkara tlan maxi cab te, heng lai vela tlan taxi te an chawl mek a, Thawhtanni atang khan an tlan lo tawh.
“Motor-in a tuar a, kan insawh nasa lutuk a, kan motor-in a dawl lo. Kan thawhchhuah aia tam a siam nan kan seng a, tlan zel chi a ni lo,” Bairabi-Kolasib maxi cab khalhtu pakhat chuan a ti.
Kawng a chhiat avangin tlan chhung pawh a rei tih an sawi a, kawng a that chuan Bairabi leh Kolasib inkar hi darkar 1 chuang hret an tlan thin a, tunah chuan zing dar 6-a an chhuahin chhun dar 12-ah te an thleng tih te an sawi.
Khawthlang lamah Darlak leh Tuidam inkar a chhe khawp mai a, lirthei chesual pawh a awm thin.
Mizoram Truck Drivers Association hruaitute chuan Mizoram hmun hrang hrangah kawng chhiat vanga harsatna a thlen thu an sawi a, chhe mai tura ngaih pawh a awm nual tih an sawi bawk.
Kum hmasa lama kawng chhe lar, Mizoram chak lakna kawng pawimawh, Sairang leh Kawnpui inkar pawh nikum kum chawhnu lamah an siam na a, a chhe leh fu tawh a, a chhe zual ang tih a hlauhawm thu an sawi. A bikin Tuitun leh Kawnpui inkar a chhe zual tih an sawi a, sairang leh Buichali inkar chu a la zia tih an sawi bawk.
“An siam ve ngei a, mahse a daih rei lo ang tih kha a lang sa a. Khuar a tam leh tawh a, kan tlan reng tho a. A chhe zual ang tih a hlauhawm khawp mai,” truck khalhtute chuan an ti.
Lunglei leh Lawngtlai inkarah, Lawngtlai thlen dawn hnaihah kawng a chhia tih an sawi a, Aizawl leh Champhai inkar kawng pawh a chhe tan nia an hriat thu, ke ruk nei chi phei chuan harsatna an tawk zeuh zeuh tawh tih te an sawi bawk.
Lunglei leh Tlabung inkar kawng a tha a, mahse Tlangbung pelhah harsatna an tawk. Diblibagh leh Tlabung inkar kawng a chhiat em avangin Thawhlehni khan kawng siamin mipui an hnatlang tih thu dawn a ni.