Hmunphiah kan lei zo vek – Adviser to CM Sawrkarin a la lei zo lo – MPCC treasurer

Hmunphiah kan lei zo vek – Adviser to CM
Sawrkarin a la lei zo lo – MPCC treasurer
Adviser to chief minister Dr KC Lalmalsawmzauva chuan sawrkarin a intiam angin hmunphiah a lei zo vek tawh niin a sawi a. MPCC treasurer Dr Lalmalsawma chuan an la lei zo vek lo tih an hriatchian thu a sawi ve thung.
Tunhnaia ZPM Gen. Hqrs. Upa Committee hruaituten an kawmnaah adviser to CM (Hand Holding) Dr KC Lalmalsawmzauva hian sawrkarin a intiam angin hmunphiah chingtute hnen atangin hmunphiah a lei zo vek tawh a. Hmarcha leh aieng chu sawrkarin inrawlh ngai loin a chingtuten an hralh zo a, sawhthing erawh chhan hrang hrang vangin an beisei leh duhthusam angin sawrkarin a leisak thei lo niin a sawi.
MPCC treasurer Dr Lalmalsawma Nghaka chuan adviser to CM-in sawrkarin a intiam angin hmunphiah a lei zo vek tawh tih a sawi chu, hmunphiah an lei zawh vek loh zia hrechiangtu a ni tih a sawi.
Inrinnia MPCC Aizawl South-II Block ITI Unit a tlawhnaah Dr Lalmalsawma chuan, hmunphiah that vanglai, a keh hun lai leh hralh chhuah hunlaiin sawrkarin a leisak thei loa, tlai khawhnuah ZOHANDCO kaltlangin engemawzat, cheng vaibelchhe 6 man vel lei turin sawrkarin ruahmanna a siam a. Sawrkarin a intiamna anga kg-ah Rs 100-a laksak loin kg ah Rs 80-in a leisak tih a sawi.
Hmunphiah leina tura dah sum hi ZOHANDCO hian a la hmang zo loa, a hman zawh loh chhan pawh hmunphiah season lo laiin sawrkarin leisak a tum vang nia sawiin, “ZPM hotute kan chah duh chu, hmunphiah hmun awmnaah ngei kalchilhin, Aizawla air conditioned office changkang atanga thlir ringawt loin, a hmunah an worker-te pawh zawtchiang se, sawrkarin a lei zawhsak vek leh vek loh, hmunphiah chingtuten harsatna an tawh nasat zia a hmunah enfiah se. Hetianga kuthnathawktute thamlo tak leh hmusit taka lei zawhsak vek anga an sawi hi a pawi kan ti hle,” a ti.
Aieng chungchangah pawh Tlabung leh Reiek tlangdungah sawrkarin aieng a ro kg ah Rs 150-in a leisak ngei em, tih pawh enfiah se a duh tih a sawi a. An hriat dan chuan, aieng buaipuituten kg ah Rs 80-in Tlabung tlangdungah an hralh thei tawk niin a sawi.
“Sawrkar hian mipui mar a deh phak tawh lo. Mipui nawlpui leh sawrkar inkarah karawl zau tak a awm tawh a, mipui nawlpui harsatna hi a hriatpui tawh loh zia a chiang hle in kan hria,” MPCC treasurer hian a ti.