Hmunphiahin Bagha la thlawhkhum lo Empanelled buyer-ten sawi nawi mek

Mizoram hmunphiah hralhna chuan Bagha a la thlawhkhum hleithei loa, tunah pawh Bagha lam sumdawngte an inrawlh ve leh mek tih hriat a ni. Hetihlai hian sawrkarin empanelled buyer atana a thlante chuan sawrkar rate bituk ang thlap thlapa lei a har tur thu hmunphiah chingtute an hrilh. The Aizawl Post-in hmunphiah chin tamna Kolasib district-a a chingtute leh a buaipuitu society hruaitu thenkhat a biak kualnaah tunlai hian hmunphiah hring chu kg. ah Rs. 25 – 35 inkarin hralh a ni a, Rs.30 a pel hleithei meuh lo zawk tih an sawi.
Mizoram sawrkarin ruahman dan chuan hmunphiah hi a roa leisak tur an ni a, a ro chu sawrkar leisak ngai loin state pawn lam sumdawngte atangin kumtin lei tur an hmu reng zawk a. A hring hralhna chu an buaina zawk a ni tih an sawi. Hmunphiah chingtu tam zawk tan phoro turin buaipui a hautak bakah phoro na hmun tur thlengin a awlsam loa, a hringa an chinna hmuna man man taka leisaktu chu an mamawh ber a ni tih an sawi a ni.
Hmunphiah rate hi a che reng a, a rate that kum a awm a, that vak loh kum a awm tih an sawi a. Chutiang bawkin hmunphiah grade pawh siam harsa tak a ni tih an sawi bawk.
Grade ‘A’ hi zaah zaa siam a harsa a, a phona leh phuarkhawmnaah tih hmelhem, grade ‘B’ a tla thla hman a awm thin a, a lo berah 1-2% tal chu A grade pha lo a awm hman thin. A leitu, sumdawng lamin an ‘A’ grade na na na chu ‘A’ grade hlang an beisei luih tlat avangin indawrna kawngah harsatna a awm thin tih sawi a ni.
Chawlhkar hnih khat lekah danglam mai thei a nih avangin ‘a hunlai’ in keh ngei ngei a ngai a, rate that deuh hun nghahpui ngawt theih a ni lo. Tunah pawh keh hun chin chu keh a, a hringa hralh a nih loh chuan phoro mai a ngai tih sawi a ni a. Tunlai hian hmunphiah hring chu hralh mek a ni ta a ni.
Sawrkarin ‘empanelled buyer’ a neih zingah expression of interest (EoI) ah hmunphiah ro chauh lei tura tih a ni a; A grade kg ah Rs.100 leh B grade kg. ah Rs.80 tih a ni. Hemi ang hian lei duh an hmu lo mai ang tih hlauhawm tak a ni tih Saipum MPACS chairman Lalthlamuanga chuan The Aizawl Post zawhna a chhang.
Guwahati leh Bangha sumdawng tangdunin A grade hlang dik tak chu Rs.100 hian an lei duh thu an sawi a, B grade lei chungchang erawh sawrkar nen an inremnaah an sawi tel lo niin an sawi. ‘A’ hlang hlak a nih theih dawn loh chuan, B leh C grade pawlh, ‘mixed rate’ in kg ah Rs.75 in an lei theih tur thu an sawi a. Society lam hian inpawlh tur a nih chuan A grade leh B grade rate (100 leh 80) inkara leisak turin an dawr a, an ni lam hi an tanna ngaiah an la tang si a, indawrna a tlawlh rih tih a sawi.
Saipum bika lei tur dang pahnih chuan A grade Rs.100 a lei reng chu harsa an tih tur thu an sawi ve ve tawh tih a sawi bawk.
Hmunphiah rate chu kumtina buaina awm, mumal tak awm thei lo leh indawr tawnna atanga inleisak a ni deuh thin tih Saipum MPACS chairman hian a sawi a. Mizorama hmunphiah variety tha ber chi pawh leilung pawnlang tar tawh vang nge, a rawng a danglam thin a, hei hi Vai sumdawng ‘phakar’ deuh chuan rate hniam zawka dawnna atan an sawibuai thiam hle tih a sawi a ni.
Hmunphiah hralhnaah Mumbai lam sumdawngte nen pawh thu an lo thlung tawh a, heta rate an inremna chu Bagha sumdawngten a aia sangin an rawn ngam a, hmunphiah chingtuten a hlawk zawk an lo pan lo thei loa, thuthlung siampuite mamawh zat an pek theih loh avangin a tlawlh leh ta thin niin Lalthlamuanga hian a sawi. “Bagha thlawh khum tur chuan kan kalphung thlak a ngai. Sawrkarin society-te hi hmunphiah leikhawmna tur sum min pe se, grade tha chin chauh kan lei anga, kan stock hmak ang. India ram ril zawka sumdawngte nen thuthlung kan siam zui thei mai dawn a ni,” a ti.
Hmunphiah lei leh hralh chungchangah a chingtute leh state-in hlawkna a tel duh tak tak chuan Mizoram a inkharkhip a ngai tih sawiin, tuna kalphungah chuan India rama sumdawng lian zawkten Mizoram hmunphiah chu Bagha (Assam) hmunphiah leiin an la rawn lei reng tih a sawi a ni.