‘Hmunphiahin man a nei ta lo’

Vairengte-ah hmunphiah an lei ta rih lo a, ‘mazon’-te’n kar hmasa Zirtawpni atang khan hmunphiah an lei tak loh avangin hmunphiah thartu pakhat chuan, “Rate a awm tawh lo,” tiin a sawi.
Kar hmasa lamah khan Vairengte-ah hian hmunphiah hring kg-ah Rs 13 te’n an lei a, a man hi a tla nasa hle.
A thartute sawi danin, 2022-ah khan a hring hi kg-ah Rs 63 te a kai a, a hniam lai pawhin Rs 30-40 te a ni. Nikum khan kg-ah Rs 54-56 te’n an hralh a, a tlawm laiin Rs 40-50 te a ni.
Kuminah hian a tir lamah kg-ah Rs 25-in an hralh a, February ni 19 atangin Rs 15-ah a tla. Kar hmaasa khan Rs 13-ah a tla leh a, chumi hnuah phei chuan hralhna tur an hmu lo.
Kg-ah Rs 15-a an hralh khan an senso ang vel a ni chiah a, chuvangin Rs 15 pawh khan an hlawk tawh lo. Mahse hralh lo thei dinhmunah an din loh avangin an hralh tho.
‘Hmunphiah thartu sawm zinga pakhat pawh an hlawk pha kher lo ang,” tiin huan neitu pakhat chuan a sawi.
Hmunphiah hi an hralh emaw hralh lo emaw, tunlai hi a keh hun a ni a, March ni 10-15 vel hi a hmun hal hun a ni. Tunah hian keh loh a la tam a, an hralh theih loh avanga kek lo an ni. Kek lo ta se, a thar a to dawn lo tihna a ni a, tihchhiat atan pawh an kek dawn tho nge tih an hriat bik loh thu an sawi.
Tlabung lamah pawh hmunphiah thartute an mangang hle; anni hian a rovin an hralh a, kuminah a man a tlawm, tun hnaiah kg-ah Rs 45 a ni.
A tirah Zodin Cooperative Farming Society te’n kg-ah Rs 70 ta ni se an ti a, an ngenna avang hian kg-ah Rs 70-in an hralh. Chu chu rei lo teah Rs 65-ah a tla a, kar hmasa Nilaini, February ni 28 khan Rs 45-ah a tla. Nikum khan a ro hi kg-ah Rs 120-140 te’n an hralh a, kuminah a rate a tla nasa hle.
Hmun hrang hranga hmunphiah thartute’n hetia hmunphiah man a tlawm thut hi sorkar inrawlh vangah an ngai a, sorkarin rate a siam a, sorkar rate siam hi a hniam a, chuvang chuan mazon te’n duhtawkin a man an tihniam ngam tih chu an sawi dan a ni.