Hna berah Pangpar

Khawvel inher velah eizawnna chi thar a piang thin a, a hmaa hna ni lo, hna tling ta pawh a awm thin. Mizoramah pawh chutiang chu sawi tur a tam ang, pangpar pawh hna bera neih tham, eizawnna tlak a tling tawh.
City Park-ah Pangpar Zuar Association-in Flower Show cum Fair an buatsaih a, an hruaitute chuan he hmuna inpho mi 88-te hi pangpar hmanga eizawng, hna bera neih an nih thu an sawi.
Mahni in leh a bul velah pangpar hi phunin an enkawl a, chung chu an zuar leh thin. Khawi atan an zuar a, phun atan an zuar bawk. An zinga pakhat, an pawl secretary chuan in bulah ni lo hmun dangah a hranpain a huan a siam.
Pangpar hi miin an duh a, hralh a har lo a, a hralh lamah hian an buai lo tih an sawi.
An sawi danin, a leitute hian ina khawi atan leh phun atan an duh a, an in bul thingkung vel chei nan te, ram huana phun atan te an duh. In chhunga nung thei chi a tam a, chutiang chu hralh a tla an ti a, in thar neite hian pangpar an zawng tlangpui an ti.
“Eizawnna tlak a tling a, pangpar hi chhungkaw engemaw zatin eizawn nan kan hmang. Hun pum senna tlak a ni a, chhungkaw chawm nan kan hmang,” an pawl hruaitu pakhat chuan a ti.
Pangpar hian lar lai a nei thin an ti a, tun hnaia lar an tih chu Naga hling an tih hi a ni. Hlinglukhumpar ang chi deuh kha a ni a, tunlaiin an uar a ni awm e. Saron, Israel Daisy, geranium, hydrangea, lysianthuse, fir te a lar a, rose hi a lar reng an ti.
Mizo pangpar a lar reng a, hralh a tla reng tih an sawi a, sappangpar, kumtluang, derhken, mawzapar leh Mizo pangpar chi dangte pawh a lar reng an ti.
‘Mizo pangpar hi chu a lar reng. Inthlah chhawn thil a ni ang, kan lung te hi a tileng niin ka hria a, kan than hnan te pawh a ni ang, mipui hian kan ngaina reng,’ pangpar zuarte chuan an ti.
Pangpar ngainatna leh mamawhna hi a zual an ti a, eizawn nan a tlak an tih bakah an tuina a nih avangin pangpar enkawl hi hna bera neih a awl an ti.
Pangpar Zuar Association bakah Mizoram Florists Association an awm bawk a, chhungkaw engemaw zatin pangpar hi hnaah neihin eizawn nan an hmang mek.