Hna lak cancel tura ngenna chhang lo

Hna lak cancel tura ngenna chhang lo
Health department National Health Mission hnuaia hna pasarih lakah advertisement leh dan tlawhchhan awm mumal loa lak a awm nia Mizo Zirlai Pawl-in an sawi leh, 2025 June 10 hmaa cancel leh tura sawrkar a ngenna chu department lam atangin chhan letna an la dawng lo nia sawi a ni.
MZP Gen. Hqrs. chuan Health department-ah National Health Mission hnuaia post 7 – laboratory technician 3, staff nurse 2, assistant data manager 1 leh executive assistant 1 chu advertisement tel loa lak a nih bakah hemi kaihhnawiha DP&AR (ARW) office memorandum tihchhuah chu zawm a ni lo tih a sawi a. NHM hnuaia dan dik taka hna lak chu an website-ah awlsam taka en leh hmuh theih a nih laiin, heng an sawi tak hna hi tarlan a ni lo niin a sawi bawk.
Thalai hna zawng mekte rilru tina leh ti hnual thei zawnga hmalakna chu engti kawng mahin a enliam dawn lo tih sawiin, June 10 hmaa heng hna lak tawh hi cancel turin an ngen tih a sawi a ni.
2025 June 3-a thuchhuah hmanga sawrkar an ngenna hi June 8 tlai lam thleng kha chuan sawrkarin a la chhanglet lo niin MZP hruaitute chuan an sawi a. An hun tiam a ral hun thlenga sawifiahna emaw an phut anga hna lak cancel emaw a ni lo a nih chuan hma lak zel dan tur an ngaihtuah dawn tih an sawi a ni.