Hna lak danah politics inrawlh leh inrawlh loh MLA-in zawt

Siaha-a Mizoram Youth Commission Coaching Centre-a thawktu pahnih lak dan chu political appointment a nih leh nih loh Siaha bialtu MLA Dr K Beichhua chuan House-ah a zawt.
Zirtawpnia Assembly Session-ah Siaha bialtu MLA hian Siaha MYC Coaching Centre dinah ama fund atangin bungrua leh hmanrua lei a nih bakah in luah man pawh a tum a. Chutihlaiin he Coaching Centre-a coordinator leh 4th grade chu a chhan sawi lang loin 2024 August 31 khan chawlhtir an ni a, an aiah 2024 September 1 khan Siaha District ZPM hruaitu pakhat fapa leh hruaitu dang nau chu an hmun luah tur hian lak an ni tih a sawi.
Heng mithar pahnih hi engti anga lak nge tih Dr K Beichhua hian zawtin, dan dik taka lak ni lo, politic thila lak an nih chuan thil serious tak a ni a. Dan loa lak ni ta se, a changtu minister-in a bantir leh dawn em tih a zawt a ni.
LESDE minister Lalnghinglova Hmar chuan Mizoram Youth Commission chu LESDE hnuai ni mah se, inrelbawl hrang deuh an nih angin a hriatpui vek loa, tuna thawktute hi an term a tawp tawh a, pawhsei zel an ni a, an pawhseina chu a tawp leh tawh em tih a hriatpui loh avangin MYC hotute nen inbia in, Siaha bialtu MLA chu ziaka an la chhan tur thu a hrilh a ni.
MYC hnuaia hna lak dan hi awmze nei zawka kalpui tumin tun Session-ah hial Bill an pulut dawn a, House-in a pawmpui chuan mumal zawkin hna lak kalpui theih a ni dawn tih a sawi a ni.