Hna tha loah a tul angin action la Sawrkar hnaah a thiam leh tling la – Chief minister

Hna tha loah a tul angin action la
Sawrkar hnaah a thiam leh tling la
– Chief minister
ZPM sawrkar hnuaiah hnathawh tha lo a awmin a tul angin action an la zel a. Sawrkar hna lakah pawh a thiam leh tlingte chauh an la tih chief minister Lalduhoma chuan a sawi.
Thawhtannia ZPM party office-a inkhawmah chief minister hian, mipuiin beiseina sang tak nen an thlir a ni tih hria in, ZPM sawrkar hnuaia hnathawh reng reng a tha tur a ni a, contract hna a ni emaw MLA Fund hmanga hnathawh emaw, kalphung thar mipui sawrkar hnuaiah chuan a tha bik tur a ni tih a sawi.
Hna endiktu tur political party hrang hrang awmna Mizoram State Monitoring Committee an din chuan rim takin an thawk mek a, hna tha lo chu a tul anga action lak niin, an la zel dawn tih a sawi.
“Sawrkar hna lak chungchangah a thiam leh tlingte chauh kan la zel dawn a, kan thalaite pawh taima taka lehkha zir tur leh thiamna tak tak neia kan ram tana mi chhenfakawm ni turin ka chah a ni,” chief minister chuan a ti.
Zoram mipuiin sawrkar thara rinna leh beiseina thar an nei chu lawmawm a tih thu sawiin, chu chuan chakna a pe thin tih a sawi. Famkim lo ni mah se, amah leh a thawhpuite nen theihtawp chhuahin ram tan chawl loin hna an thawk a, ramin hmasawnna hmel thar a hmu chho mek chu thinlung takin an lawm tih a sawi a ni.
“Ram rorelnaa Pathian ram tundin tumtu party kan ni a, tlang hrang hranga kan lungrualpuite pawhin rilru thianghlim leh ram hmangaihna thinlung chhawmnung zel turin ka chah. Keini party lo hi Zoram mipui hian innghahna an nei tawh lo tih hria in, mahni hmun theuhah thahnemngai taka ram tana thawk zel turin ka chah a ni,” Lalduhoma hian a ti.