Hna thawh tawh leh thawh mek endik
Hna thawh tawh leh thawh mek endik
Mizoram State Project Monitoring Committee (MSPMC) chuan an vice chairman R Lalrinawma, IRS (Rtd) kaihhruaiin Lawngtlai leh Siaha-a sawrkar hmalakna kalpui thenkhat an endik.
Ningani khan Siaha DC office building leh bangla, Polytechnic building leh nursing school an enfiah a. Team dangin EMRS Noaotla (Niawhtlang), Siaha -Lobo- Tluangram (Hakha/ Myanmar) Noaotla to Chakhei road (PMGSY) hnuaia sak an enfiah thung.
DC office hi NEDP atanga Mizoram PWD sak a ni a, DPR/ estimated cost/ approved cost chu cheng nuai 610.11 a ni. 2018 October 31 khan sa tanin, kum hnih chhunga zo hman tura ruahman a ni a, zaa 90 zawh tawh a ni. DC bangla (Type VI) hi NEDP atanga MPWD sak a ni a, DPR/ approved amount chu nuai 110.90 a ni. 2018 November 26-a sak tan niin, hna zaa 98.3 an zo tawh.
Thosai-a Polytechnic administrative cum Academic block bakah staff quarter hostel leh building hi CSS atanga MPWD sak a ni a. 2016 April 11-a sak tan niin, approved cost nuai 800 a ni. GNM School building hi CSS atanga H&FW department sak a ni a, DPR/ approved amount nuai 377.10 niin January 2013-a sak tan a ni.
MSPMC Team hian heng building satu contractor-te nen sak zawh a nih loh chhan leh harsatna awmte zawtin tangkai zawka hman theih dan tur an zirchiang a. Hnathawh tawh chin that leh that loh bakah an hnathawh chungchang an sawipui nghal.
Nilaini khan Lawngtlai District Sports Complex Mampui leh Thingkah-a Polytechnic building hnathawh an enfiah a. Polytechnic building – Academic block, hostel leh staff quarter-te sak zawh a nih atanga hman a nih loh avangin a hlui chhe tawh hle a, luah loha dah reng loa tangkai zawka hman theih dan an zirchiang. He building hi PWD kaltlangin cheng vaibelchhe 8 senga sak a ni a, kum 2013-a sak tan niin kum 2014-a sak zawh a ni.
Lawngtlai District Sports Complex hnathawh tawh chin that leh that loh bakah hun tiam chhunga zawhfel a ni thei dawn em tih an endik a. A sak hna hi Decor India, Guwahati-in thawkin, cheng nuai 5019.43 senga sak tur a ni. 2022 July 25-a sak tan niin, kumin July 24-a zawh tura ruahman a ni. MSPMC Team hian Decor India hotute kawmin, an hnathawh chungchang an sawipui a ni.
MSPMC Team hian an thil endik leh zirchian hi report mumal tak siamin chief minister hoin an la sawiho leh dawn a ni.