Hna thawk tlak lo….

Tun hnai khan chief minister chuan, hnathawktu tha kan neih theihnan department tinah Service Review Committee din a ni, tiin a sawi a. He committee hian hna thawk thei lo emaw thawk tlak lo emaw a dap chhuak ang a, a tul angin dan anga insingsak kan tum, a ti a. Sawrkar hnathawkte service quality a that hian kan ram quality a tha dawn a ni, a ti bawk.
Sawrkar hnathawk han tih hian, tuna service review committee-in a enzui deuh bik tura ngaih zingah ministerial staff (LDC/UDC etc) te hi technical hnuaia langsar deuhte an ni thei awm e. Heng level thawk tura lakte hi an hnathawh turah tling leh tlaka ngaih an nih avanga sawrkar hnathawk tura lak an ni a. Sawrkar hna an thawh hnua an hnathawh tur an thawk thiam leh si lo a nih chuan, sawrkar hna thawk tura latute an demawm pha dawn tihna a ni bawk awm e.
Thil dang awm leh thei chu, hna an thiam leh thiam loh lam thluk lova, ‘political fitness’ an tih mai hmanga hnathawk tur lak an nih thin vang, tih turte pawh an lo awm a ni thei ang.
Tunhmaa, ‘thiante thawh kep ngai khawpa ruihhlo leh thil dangin a tihbuai thin sawrkar hnathawk zingah an awm’ tia sawi thin ang kha chu tun hnuah hi chuan, ‘an awm tawh lo’ han tih liam puat ngam chu ni lo mah se, sawi tur an awm tam tawh lo niin a ngaih theih awm e.
Chutih rual erawh chuan, khawvel thiamna thar, information technology hrang hrang hmanga hna thawh a lo ngaih zel tak avang hian, hnathawktute pawh intuaithar zel tur an ni. Chutih laia intuaithar peih lo leh intuaithar duh lo emaw an lo awm a nih chuan, hna thawk thei lo emaw, hna thawk tlak lo emaw an lo ni mai dawn tihna a ni a. Chutiang mi chu an awm nual thei ang.
Tuna service review committee din a ni hi thil tha tak a ni a, engtiangin nge hma an lak dawn tih mipui lam chuan chipchiarin kan hre pha lo ang a. Chutih lai chuan, sawrkar hnathawk nghet senior zingah, intuaithar ve lem lo, an mawhphurhna pawh hlenchhuak hlei thei lo, contract basis-a hnathawk tura lak DEO (Data Entry Operator) etc te thawh kep mai maia khawsa nawk nawkte pawh awm theih a ni.
A technical lam ni lem loah pawh, sawrkar hnathawk ni ve si, sawrkar hna aia pawl leh kohhran lama inhmang nasa zawkte pawh a awm theih ang. Sawrkar hnathawk chunga pawl hrang hranga a khaipa ber tangte pawh an awm ang. Hengte pawh hi sawrkar hian, vawilehkhata tihtawp thut chu a harsa ang a, tih reh dan hi a ngaihtuah a ngai. Chutiang bawkin mipui lam pawhin sawrkar hnathawk, thawk hlawk leh thawk tha tur kan duh chuan, pawl hruaitu atan sawrkar hnathawk ni lo kan ruat/thlan te pawh kan intihhmuh deuh deuh a tul awm e.