Hnah khawr pangang puang

Tun hnaiah Champhai district-a khaw thenkhatah pangang a puang a, ‘hnah khawr pangang’ tia sawiin loneitu chhungkaw engemaw zat a tibuai.
Tun hnaia pangang puang, ‘hnah khawr pangang’ an tih hi sap tawng chuan ‘leaf folder’ an ti a, Champhai district-a East Tuipui bial khaw thenkhatah a puang a ni.
Agriculture and Farmers’ Welfare department hotute sawi danin, hnah khawr pangang hi June thla tir lam atang khan East Tuipui biala khaw hrang hrangah a puang a, buh hmun a bei deuh ber.
Champhai District Agriculture Office-in report an dawn chinah khaw pasarihah pangang hi a puang a, Leisenzo, Sesih, Khuangleng, Farkawn, Mualkawi, Tuipui leh Hruaikawnah te a puang a ni.
Heng khaw pasarihah hian loneitu chhungkaw 295-in pangang puang hi an tuar a, ram hectare 169-a vela zauah pangang hi a puang a ni.
Agriculture department hotute chuan pangang puang hi a zia tawh a, thunun theih a ni tawh tiin an sawi. Rannung thahna hlo a theih ang anga sem a nih thu an sawi bawk.
Agriculture department hotute chuan tuna pangang puang hi fall army worm ang a ni lo a, thunun (control) har a ni lo tiin an sawi a, buh pawh pangang puang hian a tichhe nasa lo tih an sawi. East Tuipui bial pawn lamah hetiang pangang hi hmuh a ni rih lo tih an sawi bawk.
Hetiang pangang hi thlai tichhe thei pangangah thlai tichhe nasa lo ber chi a ni a, agriculture mithiamte chuan an ti a, kum dangah pawh East Tuipui bial khaw thenkhatah hmuh a lo ni tawh tih an sawi.