MZU-ah Entrepreneurship Development Centre din

Indian Institute of Entrepreneurship (IIE) kaltlanga North Eastern Council-in a sponsor, Mizoram University (MZU) Incubation Centre hnuaia ‘Entrepreneurship Development Centre’ chu Zirtawpni khan Lobour, Employment, Skill Development & Entrepreneurship minister Lalnghinglova Hmar chuan a hawng.
Building an hawng satliah mai a ni mai loa, hmathlir an tlangzarh tel tih LESDE minister hian sawiin, “Chu kan hmathlirah chuan kan ram hmasawnna tur leh thanlenna tura kan suangtuahna chu entrepreneurship kaltlangin a tak ramah a chang dawn a ni,” a ti.
Entrepreneurship programme kaltlangin thalaite talent peipun a, chhawr tangkai a ni dawn tih a sawi a. Chu chuan state economy a ti thang lian anga, economy chawinunna thisen zunzam chu entrepreneurship a ni tih a sawi.
“Entrepreneurship hian thilthar ngaihtuah chhuahna/ chin chhuahna (innovation) chu kan thalaite-ah a chhem alh anga, chu chuan eizawnna ngialnghet leh khawtlang hmasawnna a hring chhuak dawn a ni,” Lalnghinglova Hmar hian a ti. Chutihrualin entrepreneurship chuan risk a keng tel tih erawh hriat reng a ngai tih a sawi bawk.
MZU Incubation Centre director Prof. Laldinliana chuan an hnuaiah hian company 38 an enkawl mek tih a sawi a ni.
He hun hmanpuitu MZU vice chancellor Prof. Dibakar Chandra Deka chuan Incubation Centre siam application pahnih – Sentezel leh Thlado a tlangzarh a ni.