Hnahthialah cyber crime inhrilh

Mizoram Journalists’ Association (MJA) leh Home department tangdunin cyber crime kaihhnawiha hriat tur tul inhrilh hna an kalpui chu chhunzawmin Thawhlehni khan Hnahthialah neih a ni.
Seminar hmanpuitu South Tuipui bialtu MLA Jeje Lalpekhlua chuan tunlaia kan mamawh tak mai cyber crime chungchang inzirtir a ni chu lawmawm a tih thu a sawi a. Social media-in thil a ti thei tawh a, a tha lama hman theihna a tam rualin a chhe lama hman a awlsam zawk fo tih sawiin, “Fake account siama midang pawi sawi leh sawi loh ngaihtuah loa duh duh sawi an tam thin hi a pawi a; dan hnuaiah thubuai awrh theihna awlsam tak a nih avangin mipui kan fimkhur tlan a tul hle,” a ti.
Inbumna laka kan filhlim theih nan social media leh internet facilities hrang hrang chu mitinin fimkhur taka hman thin a tul tih MLA hian a sawi a. Inhrihhriatna tha zawk khawtlang leh mimal theuhah a awm a pawimawh tih a sawi a ni.
Seminar hi MJA Gen. Hqrs. president C Lalrambuatsaiha’n kaihruaiin, Mizoram Police CID Crime addl SP Zonunsanga’n cyber crime chungchanga hriat tur hrang hrang a sawi a ni.