Hnam dang hnena hming hralh…

Mizoram Merchant Association chuan mizo, sumdawnna atana an hming hnam dang hawhtirtute chu ‘hnam hralhtute’ tiin an vuah a. Mizo hming hawha sumdawnna tihtawp tuma Central YMA hma lakna an thlawp thu leh a tul anga thawhpui an inhuam thu an sawi a.
Tun hma deuh khan zirlai pawl ten hetiang hi an lo buaipui chiam tawh a, an buaipui lai chuan a han zia deuh a, mahse hun a lo kal leh a, tunah chuan pawl lian zawk YMA a inrawlh a ngai ta hial a.
Hetianga hming hawhtirtute chu thla khat chhunga inching fel turin April ni 10 atang khan hun pek an ni a. Hun tiam chhung a ral ta a, enfiah huna lo la inchingfel lote chu an dawr kalhsak tur an ni dawn ta a ni.
Sumdawnna thila hnam dangte hnena hming hawhtir hi dan kalh a nih piah lamah, hnam tan a him lo a. Hnam tana him lo ti duhtute chu hnam phatsantu, hnam hmelma an ni tihna a ni a. Hetiang tih chingte hian a hlawkna um ringawta hnam phatsana thil an tih hian hnam dinhmun an tiderthawng a. A awmzia chu, hmelmate mahni chenna ina a ruka bihruktir ang an ni. An bihruktira te nen anmahni chenna in foundation kher chhiat tumin an hnatlang ho thin tihna a ni ber awm e. Khawtlang duh loh zawng, sawrkar dan kalh ni bawk, hnam tana tha lo leh him lo la ni lehzel a ni.
Central YMA pawh hian sawrkar hnuaia hetiang kaihhnawih buaipuitu lama thuneitute hriatpuina leh telpuina hnuaiah enfiah hna hi thawk thei se a duhawm hle a; duhthusamah chuan, all NGO aiawh tinte pawh inkoh khawm a, enfiah hna hi thawh tlan theih ni se, a result a tha deuhin a rinawm a ni.