Hnam dang lungawi lote’n kawng dang
Khamrang leh Buichali inkar kawng chhiain a nghawng lirtheia eizawngte an mangang a, tun hnaiah pawh lungawi lova kawng dang an awm – hnam dang.
July ni 28 khan kawng chhiaa tang hnam dang, lirthei enkawltute lungawi lovin Khamrangah kawng an dang a, engtin tin emaw an inthlem lungawi thei.
Mizoram Truck Drivers Association (MTDA) hruaitute’n Khamrangah hnam dangin kawng an lo dang hi an hmu a, an sawi danin, an tang rei tawh lutuk mangangin kawng hi an lo dang a, tank lorry leh gas phur tlan tur dangin kawngah an lo thu a ni.
Ni 10 tang tawh te, ni 12 tang tawh te an ni a, chutianga an tan laia Mizoram sorkarin tuialhthei phurtute leh gas phur an tlantir chu hrethiam lovin kawng hi an dang tih an sawi.
Tun hnaiah kawng chhiat vangin tuialhthei phurtute an nuar a, Mizoram sorkarin biain tuialhthei phurtu kawng laka dingte chu Aizawl panin an tlan ta, gas phur an tlan bawk. Lirthei engemaw zat an tan laia venhimna hnuaia anni tlantir an ni chu an hrethiam lo a, MTDA hruaitute’n an hmuh lai hian tuialhthei phurtu tank lorry pali leh gas phurtu pakhat an lo dang.
‘An lo tap per pur mai a, an tan rei tawh avanga an hrehawmna chu thuhran ni se, an chhungte dam loh avanga haw thuai thuai ngai te an lo ni a. Anni an tan laia sorkar puihnaa a then an lo tlan kha an hrethiam lo a ni,’ MTDA hruaitute chuan an ti a, engtin tin emaw an thlem a, an kal darh ta tih an sawi.
MTDA hruaitute chuan July ni 28-a an kal hian Aizawl atanga chhuak lirthei 300 vel leh Aizawl pana tlan lirthei 400 vel, Kawnpui daiah 100 vel, Rengtekawn velah 300 vel an tang tih an sawi.
Kawng siamtute’n lirthei an tlan reng avangin kawng an siam chak thei lo tia chhuanlam an siam avangin police-in lirthei hi an dintir tih sawiin MTDA hruaitute chuan, an kal lai hian kawng siama hnathawh a lo awm chuang si lo a, tlantir turin police-te hi an ngen tih an sawi. An sawi danin, hnathawk pawh mi 10 vel an lo awm a, kawng siam lovin side drain vel an lo hai a, lung pawh an lo nei lo. A hnu deuhah chuan lung phur te pawh an hmu a, kawng hi an siam thuai an beisei thu an sawi.