HNAM DANG NEIH – A HMEI A PA-IN!

ZOREMI hMAR
Mizote hi kan la tlêm ngaihtuah chuan khawvel ram dangah kan inzâr pharh nasa ve tawh hle a, kan hmeichhiate zingah hnam dang kawp leh pasal atana nei hial pawh kan ther ve ta fur mai. He thilah hian hmeichhia chauhin mawh kan phur lo va, kan mipate in pawimawh em em a ni.
Hmeichhe lam:
Hnam dang ngaizawng emaw, an fa pâi leh pasal atana nei apiangin thiam inchantir nan Mizo mipa nêpzia an chhuanlam deuh vek. Kan mipate nêpzia leh tlin lohzia tlângaupui kher lovin, “Ka hmangaih a ni,” ti mai Thin ta se kan lung a dam deuh ang em! ‘An nun a nia, an thu thu’ tihsak hi a dik. Mi nuna inrawlh loh pawh a Tha. ‘Hmangaihna hi alawm hlu ber, an inhmangaih chuan a Tha a ni mai alawm’ ti in awm pawhin, dawt in sawi reng reng lo. Kan khawvel changkang zelah, ngaihdan leh thlir dan zau tak neih hi a sualna a awm lo va, hnam erawhin a tuar dawn tih hi ngaihtuah thlen fo a va Tha êm! Rilru zâu leh hnampui zawkte angin kan la tam ve si lo. A nazawnga mi nuna inrawlh sek chu thil Tul lo leh buai thlawnna a ni a, mahse kan hnam hnuk khawih thilah chuan kan inrawlh ngei ngei tur a ni zawk.
Hêng, mahni hnampui iai vanga hnam dang hnena inphalte hian an sawi tel tam ber chu Mizo zingah nuthlawi kan tamzia, chu pawh chu mipa nêp vang tih hi a ni a. Mizo mipa hi an nêp ngawr ngawr a ni lo va, Sawmah pahnih khat te chu innghahna tlâk an lo ni lo ve thei e; mahse hnam tin zingah a hmei a pa-in mihring nêp hi chu kan awm vek. Chung mite, mi tlêmte vanga a hnam pum mipa hmer tel puk mai hi chu a dik hlel ve deuh a ni. Mipa pangngai, hmeichhe nun mawi pangngaiin an neih vanga Zofa hei zât pung hi alawm maw kan nih le!
Mizo hmeichhia, pasal atana hnam dang nei kan tam dan ngaihtuah hian kan mipa, nupui atana hnam dang nei chu khaw var lam arsi ang pharhin an khât a, an vâng a ni. Ram leh hnam an hmangaih thu sawi kûr nguai lo mah se an nunpui a, Mizo nula min nei hram hram hlawm tihna a nih chu. Hnam dang nula, nupui pali leh hmei pasarih pawh nei se, an thlahte zawng zawng Mizo tur tho zawk lehnghalin, an hnam hmeichhia ngei min nei deuh vek! Hmeichhiain hnam dang kan neih thung erawh chuan an hmingah Zoramhmangaihzualviaua Sailo tih te, Vanlalmizorama Tlâu tih pawh phuah sawmsarih mah ila, an thlah zawng zawng hnam dang an nih loh phah chuang lo; hnam kan phatsan dan hi a chiang bik ngawih ngawih mai a ni!
Duh ve ngat se kan tlangvalte hian Mizo nulate tlin lohna sawi tur hi an hre hnem ve ngawtin ka ring a, hnam dang nula aia kan nalh fâl bik lohzia te, an phû loh khawpa ropui kan nih bik lohzia te hi ni thum leh chawhma daih sawi tur an hre ve tho ang! “In mawng leh lei a inhnaih si, a la fual zui,” te min ti ta se, “In tukhum leh in mawng a inhlat leh em em a!” te ti bawk se…Hmm! Kei chuan chhan ngaihna vak ka hre lovang, “Kan hâ a la sen zui, tuibur leh sahdah hmuam kan tam si, dik tak chuan kan Thing ve eee!” te ka tih mai mai ka ring! Kan hmêl, kan pian leh kan life style hrim hrimah hian han hawi sâng vah ngam tur kan tam bik lo tlat. Kan mipa ten min phû lo tlata inhriatna kan nei a nih chuan, rilru lam dik lohna nei, kim chiah lo kan ang thei dawn; kan phû tawk chuan min rawn chhâi tho tho dawn tih hriat tur.
Mipa lam: Chutih rualin mipa lam pawh inenfiah ve fo a Tul. Mizo nula ten ‘neih tlak loh’ tih Tawngkam an chher chhuak hi awmze nei lo Thak chu a ni bik hauh lo. Chhuanlamah ‘in phû tawk an hniam a ni mai lawm’ te hi in ti leh ngawt Thin, chutiang a ni lo. Châwmhlâwm tlangval in tam lutuk tih an hai bik loh vang zawk a ni. Nu leh pa leisak lirthei nei te, nitin maia pocket money tur nu-te dil a, dil chhuak tam zo tak tak bawk si lo, bialnute treat ngai zawk ziah, bialnu nei lova awm thiam leh chuang miah lo in tam vang khan an beidawng ru fo asin. He khawvel ramzauva hmeichhia tu pawh hian, nupui fanau châwm zo tur, innghahna tlâk leh rethei bak berh lutuk lova chhungkaw dinpui theih tur mipa an duh vek; Mizo hmeichhia chauh kan ni lo. Hnam dang neih châk vang ngawr ngawr emaw, Mizo mipa ngaihnêp hrim hrim vanga hnam dang nei hi…awm chu an awm ve ngeiin a rinawm a, chutih rualin a nawlpui hi chuan innghahna tlâk ni-a an hriat an nei mai Thin tih hi thil chiang lutuk a ni.
Mizo tlangval tam tak, hna Tha tak tak thawk leh taima em em, chhungkaw innghahna ni thei khawpa mipa puitling leh zahawm an tam zawk fe na chungin, Thenkhat chu mahni thawh phâk ang pawh thawk Tha peih lo, incheina leh mi neih ang neih ve duh tho bawk si an tam em em a, facebook lama tam em em, Tawng thei zet, nilenga hman tih hriat ngawih ngawiha mi thil post comment a, a dik a dawk, mawi leh mawi lo pawh thlu lova râk chiam chiam ho kha alawm, kan nula ten an iai Thin ni. Hnam dang neih chungchang bikah phei chuan inhnial an inpeih at a, dimdawi ngai zawk hmeichhiate an hnial zuah zuah a, an hnial hneh poh leh nula ten an iai zual tih lah an hre dêr si lo! HmelTha an tih deuhte hnena a eng a mah ahmaa sazu thlalak thawn ngawt Thinte phei chu nula/nuthlawi-te hian an ngaisang thei miah lo. Mi pangngai chuan hetiang thil hi an ti ve ngai lo va, mahse a ti Thin tlêm tê avang khan Mizo mipa an hmer tel lo thei lo Thin tihna a ni.
Hnam pui zawk dangte chuan hmeichhe zah der an hreh lo va, an duat thiamin an zah thiam a, an ngaihsak a, ‘Gentleman dik tak chuan an bialnu/nupuite hi lalnu ang maiin an siam Thin’ an tih hi a dik em em a ni. Chutiang tur chu kan duh ve a ni mai ni! Hnehsawh leh thu dêngkhawng tak taka hmeichhe Tim ching, hnial zuap zuap, hmeichhe zahawmna leh hlutna hrethiam miah lo mipa kha Mizo nula ten sexy an ti mawh khawp a nia. Hmeichhe hovin kan han sawi liam liam hian Mizo mipa, mawi lo tak taka hmeichhe biak ching leh thlalak dukdak lo zet zet thawn ching kan lo block Teuh mai che u a lo ni a, nangni vang khan in mipatpui tam tak en tleu an nih phah tih hre hrâm ula ka ti mang e! A hmei a pain, indem kual lova mahni Theuhin ram leh hnam humhim duhna thinlung kan neih theih nan Tan i la zel ang u.