Hnam dang nupui/pasal neih….

MZP General Headquarters chuan 2015 atanga kum tina an lo tih thin dan angin, “Hnam dang Nupui/Pasal nei lo tura inzirtirna Ni” chu September ni 2 khan an hmang a. Aizawl khawpui chhunga school hrang hrangah an insem darh a.
MZP hruaitute chuan, Mizote chu kan chhehvel hnam dangte nen tehkhin chuan hnam tlemte kan ni a. Kan hnam hi humhalh a ngai takzet a. Chimralna laka kan hnam humhalhna turin hnam dang nupui pasalah i nei lo ang u, tiin zirlaite hnenah an campaign a. Mizo ten chimral kan hlauh loh hun hi kan ral hun tur a ni, an ti bawk.
Ni e, kan tlem avangin leh chimral tham lek kan nih hriain khatih laia India ram awptu British sawrkar pawh khan inhung bikna dan hnuaiah min lo khung kha a ni a, hnam pui nge nge an lo thlir lawk thui a, tunah hian kan vanneih phah a tih theih awm e.
He inhung bikna dan hi a hming chuan a la nung ve tek tek a, kan hman danin a zir loh a, ni tin ILP hum chunga hnam dangte hi kan rama kan luhtir reng na na na chuan, ILP vêk hmang hian min la chim pil hun a la thleng ngei ang; chu chu tunah pawh hian a thleng mek. Pathianni zinga thlasik nilum aia kawngsira thu tlar nghukte an pun chakzia hi, thenkhatin fiamthua ‘Vai Ni’ an tih nen a inhmeh hle. Rel kawng a lo lut thuk tual tual a, Rel hmang tangkaitu tur chu hnamdangte bawk hi an ni a, a ruakin rel hi a lo lut ngai dawn lo a ni. Chutih hunah chuan sum duhna avangin (tunah pawh kan ram chhung ngeiah hnamdang sumdawngte hnenah hnam hming kan hralh mek a ni a) kan hming hralh chauh loh pawh, kan taksa thlengin kan la hralh duh lovang tih sawi theih a ni lo. Chuvangin, tun atanga awareness tha taka kan kalpui hi a pawimawh takzet a. Zirlai pawl hmalakna hi pawl hrang hrang leh khawtlangte pawh hian ‘back up’ theih a tha viau ang le.
Tunhma aiin ni tina thihna thlen dan hi a sang tual tual a, chutih laiin kan punna rate (decadal growth rate) lah a hniam zawngin a kal zel bawk si. 1991-2001 chhunga decadal growth rate kha 28.82% a nih laiin, 2001-2011 ah chuan 23.48% a ni a, covid-19 vangin 2021 census neih a ni lo a, mahse kan san thutna chhan tur a awm lo maithei.
Kan tlem tawh nak alaia hnamdang thisenin min la pawlh dal zel a nih phei chuan, kan hmabak chu hnam ral a ni mai awm e; tihtak zeta tanrual a ngai a ni.