VL-a
Tuikual South
-- Advertisement --
Halpuah leh halmawi hal that lohna leh hautakzia chu kan hre theuh awm e, chuvangin sawi lang kher lo mai i la. Kum 2008 Kum tawp lam khan Congress chu rawn Sawrkarin Home Minister hoin Halpuah leh halmawi khap chungchang sawiho a ni a, Krismas a hnaih tawh avangin hmalakna hun a tlem tawh si a, kumhlui thlah lai darkar khat hun chhung halpuah leh halmawi halna hun hawn a ni a.
Mizo mipuiin thu kan lo awi tawh thin hle
Kum 2009 khan khap vek tura rel niin halpuah leh halmawi hal tlemna Veng tan lawmman siam a ni nghe nghe a, kha mi kum khan a puak ta lo tih theih a ni a, chutichuan a hnu zelah pawh kum 2009-2012 kum 4 chhung chu a puak ta lo tih theih a ni ta hial a, Mipuite hi thil thaah chuan kaihhruai kan lo nuam hle mai tih a lo lang kha a lawmawm hle a ni. Ram hruaituten an zir phawt chuan Mizo te aia hnam pum anga tha leh kaihhruai nuam hi an awm bik kher lo ang.
Sawrkar berin Halpuah a hal ta a le
Kum 2013 khan Congress chu lo Sawrkar nawn lehin khatih lai a Chief Secretary Pi L.Tochhawng ho a meeting chuan Sawrkar thar lawmna te a ni nghal a lawm tiin CM hminin Aizawl khawpui a hmun thlan bikah halpuah leh halmawi chu Sawrkar berin an hal ta rup mai a, kha ta tang khan mipui thuawi tak tak lo insum tang tang thin thinlung chu lo sosang thar lehin kum tin chu a puak leh ta a ni. Sawrkar chuan Mizo thuawi em em te chu pal zutin boruak a ti chhe ta vek a ni.
Sawrkar khan a ngaihtuah chiang lo
Halpuah leh halmawi hal khap hi thil na mai lo tak a ni a, mipui nawlpui in thurual lo tak tak te hal lo tura hmin kha thil khirh tak a ni. Mi thenkhat sawi dan chuan Sawrkar hotu lian leh thil ti thei deuh te khan kumhlui thlah zana halpuah leh halmawi tel lo a, a han reh duak kha an hrethiam lo an tih kha dik tak ni maw? An tu leh faten hal an ngen nasa an ti tlat a ni. YMA ten hun leh tha tam tak senga halpuah leh halmawi hal lo tura hma an lo lak tawhna kha an hre chang tawh reng reng lo. Thingtlang khaw thenkhat ti i la khaw tam zawk leh Aizawl veng thenkhat Kulikawn leh Bethlehem veng te chuan halpuah leh halmawi hal lo turin chak takin hma an la la thei reng a, kumhlui thlahzan hian tar chak lo leh dam lo thahnem takin an pan khawm thin an ti a, Veng entawn tlak tak an va ni em.
Tun Sawrkar hian a dinna ti chiang thuai se
Tunah ZPM Sawrkar thar kan nei ta a, nikum kha chu a chawpchilh lutuk deuh a hmalakna hun a awm hman meuh lo a, a puak tha thawkhat viau a nih kha. Sawrkar hian a dawn tepa khap tum ai chuan hun a la thawl deuh lai hian ngaihtuahna sengin hma la thin se awmzia a nei ngei ang. A nihna takah chuan kum tirah hian thlirletna (Review meeting) nei thin se la, kaihthawh chawp ngai Sawrkar nih reng hi a dik lo a ni. Tin, Sawrkar hnathawk halpuah leh halmawi hal ching awm teuh thin a sawi te hi khawng taka hma lak a tul khawp mai.
Tin, Mizo mipuiin kan hmuh leh hriat reng laia Puja ah Vai hoin halpuah leh halmawi an hal thin hian mipui rilru a ti hel thin khawp mai. YMA tan pawh hlawhtling chuang lo tura hma lo lak hi a tha nat thlak thin a. Tin, halpuah chungchangah hian mi tam tak chuan YMA hi Sawrkar aiin mawhphurtu zawkah an hmuin an dem lek lek zawk fo mai. Tun a Vai puja kan la hmakhalh theih lai ngei hian hmalak a tul khawp mai. Sawrkar hian a hming maia khap loin tih tak zetin a hun takah a khap a tul tak zet a ni, chuti lo chu YMA tan pawh inthiar fihlim san mai a tha zawk hial awm e.