Hnam inpumkhat champion pui turin zirlai pawlte chah

Zirlai pawl chu hman atanga vawiin thlengin hnam inpumkhatna kawnga thawhhlawk ber an ni thin tih MP K Vanlalvena chuan sawiin, hnam inpumkhatna champion pui zel turin a chah.
September 6 zana Thenzawla neih tan Mizo Students’ Union general conference vawi 21-na, a tan zan a hmanpuinaah Rajya Sabha MP K Vanlalvena chuan zirlai pawl chu hman atanga vawiin thlengin hnam inpumkhatna kawnga thawhhlawk ber an nih thin angin theihtawp chhuah zel turin a chah. Tun dinhmunah Mizorama journalist – print media leh electronic media te chu hnam inpumkhat nana thawktu ropui tak an ni tawh, tiin, lawmawm a tih thu a sawi a. Mizo hnam hrang hrangten inpumkhatna kawngah hma kan sawn a, tunhmaa tlema tawng danglam vanga inpawm lo kha kan inpawm vek tawh tih a sawi.
Tuna zirlai, thalaite kutah kan ram a la awm ngei ngei dawn tih sawiin, “Vawiina zirlai, thalaite kan that chuan kan ram a la tha dawn a, kan ram innghahna in la nih dawn avangin nun tak nei turin kan ramin zirlaite a au a ni,” a ti. Hman aiin tunah mahni hma hun siam turin a awlsam tawh zawk tih sawiin, “Mi ti tak tak tan sawrkar hna bakah sawrkar hnathawk aia hlawh tha nei turin chance a tam tawh. Rilru nei, tumruh tan hmanlai aiin eizawnna a awlsam em em tawh a, mi hlawhtling ni turin mahni a pawimawh ber tih hria in theihtawp chhuah ang che u,” tiin zirlaite a chah.
Hun hmanpuitu dang, Serchhip bialtu MLA Lalduhoma chuan khawvel thang zelah social media awm mah se, lehkhabu aiin innghah nana hman tlak a la ni lo tih a sawi a. Zirlaiten lehkhabu tha chhiar uar a, ngaihtuahna tha nei turin a chah. Zirlai zawng zawng zirnaah an hlawhtling vek dawn lo tih sawiin, zirnaa hlawhtling lo leh thleng sang kher lo te pawh beidawng loa, kawng hrang hrangah hlawhtlinna chan theih a ni tih hria a, theihtawp chhuah turin a chah.