Hnam ro thilah zirlaite inel

INTACH Hqrs New Delhi bultumin INTACH Mizoram Chapter leh Directorate of School Education tangdun chuan Nilaini khan Aizawlah State Level Heritage Quiz Competition 2024 an buatsaih a. Class 9 leh 10 zirlaite tana tih niin, Aizawla school than bik 13 atanga zirlaite an inel a ni.
Inelna hmanpuitu School Education director Lalsangliana chuan regional leh national level intihsiakna an hmachhawn leh turah theihtawp chhuah a, Mizote tihmingthatu ni turin zirlaite a fuih.
Zirlai tel hi an vaiin 100 niin, team 50-a then an ni a, team 4-in final round an lut. Mt. Carmel School chu pakhatna niin, Kriti Bandu Deb leh Stephen VL Rotluangate an ni. St. Paul’s HSS aiawha tel Harry Lalruatfela leh Isaac Lalremruata te chu pahnihna niin, Mt. Carmel School aiawh Vanmalsawma leh Mai MaiTi Aung bakah Govt. Mizo HSS aiawha tel Freddy Lalfakawma leh Vanrammawii Fanai te chu pathumna an ni.
INTACH leh School Education tangdun hian zirlaiten hnam ro (heritage) hrang hrang – khuanu duansa (natural), mihring siamchawp (built heritage), hnamzia leh tawng (cultural heritage) an vawn a, humhalh duhna thinlung an neih zel theihna’n program a huaihawt thin a. Nikuma ‘My Monument Search 2023’ painting competition buatsaiha regional winner Regina J Zosangluaii (class-X) St. Paul’s HSS leh national winner Zothanpari (class-X) Govt. Mizo High School-te hnenah chawimawina hlan nghal an ni.