Mizo hnam sipaite inpekna avanga tun dinhmun thleng thei leh ram ralmuanga cheng thei kan ni tih deputy chief minister Tawnluia chuan a sawi.
June 30 – Remni Ni vawi 38-na Khawzawla lawm a hmanpuinaah Tawnluia chuan Zoramin zalenna a sual laia nunna hlantu hnam sipai martarte zahna chibai bukin Zoram mipuiin kan hrereng dawn tih a sawi a. Chutih rualin hnam sipai lo hawte zinga nunna chan tawhte leh la damte pawh zahna chibai a buk thar tih sawiin, “An inpekna avanga tun dinhmun thleng leh ram ralmuanga khawsa thei kan ni hi kan theihnghilh thiang lo,” a ti.
Hnam sipaite rilru huaisen zia leh an nunna hlan vek huam khawpa an inpek thu leh an beidawn loh thu a sawi. Chutih rualin Zoram mipui, kohhran, political party-te leh tlawmngai pawl hruaitute ngenna an zah avangin remna dawhkan an kil ve chauh tih a sawi a. “Tlawm vanga haw kan ni lo. Zoram mipui tana rammu leh inpumpek kan nih vangin mipui duhdan kalha chet kan duh loa, ram leh hnam hmangaih vang zawkin kan rawn chhuak a ni,” MNF ramhnuai sawrkara army chief Tawnluia hian a ti.
Hnam sipaite inpekna avanga tun hi thleng kan ni – Tawnluia
Get real time updates directly on you device, subscribe now.