CM sum atchilh vangin a cabinet ho pawhin an atchilh phah – Lal Thanzara

Chief minister berin sum a atchilh nasat avangin a cabinet minister ho pawhin an atchilh ve phah niin Congress vice president Lal Thanzara chuan a sawi.
Tuirial Block I Congress Committee Political Training, Zirtawpnia Hortoki-a neih a hmanpuinaah Lal Thanzara chuan MNF sawrkar chu chief minister berin sum a atchilh nasat em avangin a cabinet minister-te pawhin an atchilh phah vek tawh a, sum an atchilh nasat avang hian an sawrkar hmaa mipui hnena an thutiam zawng zawng kha pakhatmah tih hlawhtlin an nei loa, an thutiam an tih hlawhtlin loh hi a bua siam tham a ni tawh, tiin a sawi.
BJP sawrkar hnuaiah ram pum chu sawi loh, thenawm state leh kan state ngeiah pawh politic avangin kan buai mek tih a sawi a. Politics ngaihven lo intite pawhin Mizoram buai lai leh vawiin thlenga kan chhehvel dinhmun ngaihtuah ngun a hun tawh hle tih sawiin, India rama BJP sawrkar hnuaiah Kristianten harsatna kan tawh mek thu leh Mizoram Synod pawhin tunhmaa a pek ngai reng reng loh income tax nuai engemawzat an pek a ngai mek tih a sawi a ni.
BJP-in Mizoramah MLA pahnih khat tal an neih theihna tur nasa takin an dap dawn tih MPCC vice president hian sawiin, “Sum pawh an thehchhuah san ngam hle a rinawm. Hei hi BJP-in an thawhpui MNF party an rin zawh tawh loh vang a ni,” a ti. Congress chu sakhaw tih bik nei lo sakhaw zalenna duhtu party a nih thu te, Mizorama remna leh muanna a awm theihna tura Pathian ruat an nih thu te, state-in hmasawnna ruhrel a neih tawh zawng zawng chu tu te sawrkar tih nge tih ngaihtuah a ngaih thu leh, tu party emaw an san vang ringawta nghing tur an nih loh thu te a sawi bawk.
ZPM chungchang sawiin, Pu Lal Thanhawla ten an khum an ken hial pawha chhuat daia mut tir anga sawi duh, hetiang mi chu chief minister a nih a ring lo tih Lal Thanzara hian a sawi a. ZPM hotu pakhat chuan an buai em avangin MLA 21 pawh nei se an sawrkar a rin loh thu a sawi thu te a sawi a ni. “VUC an tih pawh, thlantlin loh te thuhnuaiah thlantlinte an awm ngai loa, tun atangin VUC thu hi MLA-ten an palzut ngal char char a ni,” a ti.