Hnam tana martar-te phum

Kumin May 3-a Manipura chi leh chi buaina chhuah hnua Zofate zinga nunna chan, Imphala mitthi dahna hmun pahniha dah chu an ruang lak theih loha a awm reng hnu ah lak an ni a, Kangpokpi lama lakte chu December 15 khan Phaijang hmuna Martyr Cemetery-ah vuina hun hman a ni.Committee on Tribal Unity (COTU) hmalakna in martar-te hi vuina inkhawm hman a ni a. Hnampual pawl hrang hrang aiawh bakah Zohnahthlak intelkhawmna pawl hruaitute, khaw hotute, volunteer, martar chhungte, social activist leh mipui engemawzatin he hun hi hmangin pawl aiawhten thu an sawi a. Manipur-a MLA pahnih – Haokholet Kipgen leh Kimneo Hangshing te pawh an tel a ni.
Manipur buaina avanga Zohnahthlak nunna chan, a bikin Imphal leh a chhehvela thite chu Imphal-a RIMS leh JNMS Mortuary-ah an ruang dah a ni. RIMS ah hian ruang 33 awmin, JNMS ah ruang 27, a vaiin ruang 60 a awm. Hetihlai hian Meitei lam pawh Lamka-a damdawi ina mitthi dahnaah ruang 4 a awm a, an ni hi Imphal lama lak a ni ve thung.
Ruang hi a khawi lam ve ve ami pawh lak hleihtheih loha a awm reng hnu ah Supreme Court a inrawlh a, inbiak fel niin, December 14 khan Assam Rifles lamin helicopter-in an la a. Lamka-ah ruang 41 thlenpui niin, Kangpokpi ah ruang 19 thlenpui a ni.
Kangpokpi ami bik hi Zirtawpni khan vuiliam an ni a. COTU chuan martar-te tana hun hnuhnung hman chhung, December 15 zing dar 5 atanga tlai dar 5 thleng, darkar 12 chhung chu mipuiin serh turin an ti a. Hei hi Sadar Hills – Kangpokpi ah chuan an zawm tha hle tih thu dawn a ni a. COTU hian Supreme Court chungah lawmthu a sawi a ni.
Lamka lama martart-te vuina hun tur hi tihfel ala ni lo nia sawi a ni.