Hnam thinlung put chuan hlemhletna in hmun a chang thei lo – MNF treasurer

Hnam thinlung pua thil engpawh kan tih chuan hlemhletna leh thil dikloin hmun a chang thei thei lo tih MNF treasurer K Vanlalauva chuan a sawi.
Mizo National Army Lalvunga Battalion Rising Day vawi- 56 na chu Inrinni khan Aizawlah lawm a ni a, he hun hmanpuitu K Vanlalauva chuan hnam movement a ral theihna leh harsatna tawpkhawka an awm lai pawhin engtin emaw in Pathianin kawng a siamsak thin tih a chiang tih sawiin, “Nationalism thinlung pua engpawh kan tih zel chuan hlemhletna leh thil diklo hian hmun a chang thei loa, midangte tan malsawmna a kengtel zawk a ni,” a ti. Sawrkar hnathawhnaah leh kawng engkimah nationalism thinlung kan put tlat chuan hmabak engtak kan nei zel dawn tih a sawi.
Mizoram leh hnam chhanna’na an nunna hlantu hnam martar-te chibai buk a pawimawh tih sawiin, “An ni chuan mahni aiin hnam dah hmasa in, Mizo hnam dinchhuahna’n an inpe a, chawimawi ang u,” a ti. Mizo hnam movement avanga kawng hrang hranga tuartu, sawisak leh hliam tuar, lung in tang leh in leh lo chante hrereng a, heng tawrhnate hi ram leh hnam tan vek a ni tih hria a, ram leh hnam tana rammu zawng zawngte pawh an hrereng tih te a sawi bawk.
Aizawl mayor Lalrinenga Sailo pawhin hmanpuiin, ram ropuiten an sipai, zalenna sualtute an zahin an ngaihlu em em thin a. Mizote pawhin martar-te leh an thlante kan zahin, thangthar lo awm turtein an la ngaihhlu dawn chauh, tiin a sawi. Mizoram tana lo tuartu, zalenna sual kawnga sulsutute an hlu hle tih sawiin, “Martar-te tluk zetin tuna dama te pawh hi in ropui a, in thawhrim rah kan seng mek a ni,” a ti. Nationalism rilru put a pawimawh a, hnam rilru pu lo te chu an ral zel thin tih te a sawi bawk.