Hnama Harhna Intawhkhawm

Zoram Thar Zofate Lairelna Inpui chuan khawvel pum huap Zofate Hnama Harhna Intawhkhawm (Zofate National Awakening Convention) chu kumin October 31, November 1 & 2 hian Vanapa Hall Aizawlah a huaihawt dawn.
Intawhkhawm thupui chu, “I tho ang u khai, i din teh tak ang u” tih a ni dawn a. Hnama Harhna Intawhkhawm hi a vawi khatna tur a ni dawn tih Zoram Thar hruaitute hian sawiin, ‘Kan ramah thlarau harhna vawi tam tak a thleng tawh thin a. Mah se, hnama harhna a la thleng ngai lo. Kan hnam hming dik tak pawh kan hre loa, kan thlahtu bul pawh tunge a nih kan hre lo. Khawi atanga lokal nge kan nih pawh kan chiang loa, bo chikimin kan la bo rih a ni,’ an ti.
Hnama Harhna Intawhkhawm hi khawvel pum Zohnahthlakte huap a ni dawn, tiin, Mizoram chief minister chu khuallian tura sawm a ni a. Political party hruaitute, hnam peng hrang hrang aiawh, college professor, NGO hrang hrang hruaituten thupui hrang hrang an sawi dawn tih an sawi a ni. Intawkhawmah hian a duh apiang a tel theih dawn tih an sawi.