Hnamdang kara kan mawina chu Mizo nationalism kan chawisan hi – Zoramthanga

Mizote hnamdang kara kan mawina chu hnam thinlung, Mizo nationalism kan chawisanna hi a ni tih chief minister Zoramthanga chuan a sawi. Mizo Zirlai Pawl buatsaih Remna Ni denchhena hlawm a hmanpuinaah Zoramthanga chuan nationalism movement hian tlakhniam chang nei mah se, dinchhuah hun a nei leh thin a, hnam thinlung, hnam movement hian chu chu a rawn kengtel thin tia sawiin, “A lo tlakhniam chang pawhin Mizo hnamin beih a tawh chiah chuan, kan ramri buaiah pawh hnam movement kha a rawn hrin chu a ni,” a ti.
“Kha kha Mizo nationalism, Mizo hnam thinlung mawina leh ropuina, miin an zah chu a ni. Hei hi kum 50 chuang kaltaa hnam movement a lokal khan miin an hmusit lo, miin an ngaisang a ni. Mizote hnamdang kara kan mawina chu, hnam thinlung, hnam movement, Mizo nationalism kan chawisanna hi a ni. Miin thildang leh politics vangin sawisel mah se, he Mizo nationalism hi a chul thei tawh lo,” a ti bawk.
Remna nei tura kalkawng biboh leh harsa takte, thil thleng tam tak chuan sawizui a hlawh loh emaw ngaihpawimawh a nih loh chuan kan history-a thil pawimawh tak chu engmah loah a chhuah theih laiin, thangthar zelten thahnemngai taka hnam chanchin leh hun kal tawh an thlirlet a, an hriatthiam theih tura ruahmanna siamtu MZP chungah a lawm tih a sawi.
Pathianin Zofate min suihzawm leh min dahkhawm a tum dan chu a lo lang zel dawn a. Mizo hnamte kan awmkhawm dan tur hi kan duh loh angte pawhin a chang chuan min hruaikhawm thin a lo ni, tiin chief minister hian a sawi a. “Ram thenawm leh state thenawm atanga kan unaute Pathianin a rawn hruailut tlat si a. Heng zawng zawng mamawh chu remna a ni,” a ti. Burma rama remna siam tur leh Northeast-a remna siam tura a hman turte chu Mizo hnamte bawk an ni maithei, tiin, “Remna siam tura Pathianin a hman duh chu Mizo hnam hi a nih a rinawmna chu, kan remna hi an rawn awt ve a, chu chu kan hmaa Pathianin a chhawp chhoh hi a ni,” a ti.
He hunah hian rambuai laia remna zawnga kohhranin theihtawp chhuaha tha a thawh avangin kohhran hmingin Mizoram Kohhran Hruaitute Committee hnenah MZP Gen. Hqrs. hian chawimawina a hlan.