Hnamdang sumdawng tih rem tumin hma la dawn

Mizo hming hawha hnamdang sumdawng Mizorama awmte an rem theih nan hma an la zel dawn tih Mizo Zirlai Pawl president H Lalthianghlima chuan a sawi.MZP Gen. Hqrs. president thar chuan hnamdang sumdawng huangtau lutuk tur ven nan leh hnamdang chimral hlauh na avangin MZP chuan theihtawp a chhuah thin a. Hnamdang sumdawng awmte an rem theih loh vek pawhin midang an luh belh tawh lohnan hma an la dawn tih sawiin, hnamdang sumdawngten Mizoram sawrkarah mumal taka chhiah an pek theihna tur an buaipui mek tih a sawi.
MZP thiltum 11 zingah inchimral theihna laka Mizo hnam humhalh leh Mizoram leh hnam tluchhe tur ven tlat, tih a tel angin, Mizo hmeichhia hnamdang pasal neite MLA candidate-a dah lo turin MLA inthlan apiangin political party tin an ngen thin tih a sawi a. Kumin inthlan turah pawh hnamdang pasal nei candidate-a dah lo turin party tin hnenah ngenna lehkha a pe vek tih a sawi.
MZP ngenna chu party tinten zahin, party thenkhat chuan hetiang mi candidate beiseite an thlak phah tih MZP president hian a sawi a. Party thenkhatah hnamdang pasal nei ngeia an hriatte candidate turin a ri ring hle, tiin, a tawp thlenga an do tur thu a sawi a. Party tinte hnamdang pasal nei candidate-a dah lo turin an ngen nawn tih sawiin, Mizo mipui chu MZP dinna hriaa hnamdang chhungkuaa lutte hnawl ngam turin an ngen tih a sawi a ni.