Hnathawh that vangin Health minister-in lawmman a dawng

Hnathawh that vangin Health
minister-in lawmman a dawng
Achievers’ World leh Indian Achiever Forum tangdun buatsaih ‘National Summit 2026 – Vikshit Bharat 2047 through Comprehensive Socio-Economic Development’ New Delhi-a neihah Health & Family Welfare leh Social Welfare, Women & Child Development minister Lalrinpuii chuan chawimawina ‘Women Icon Award 2026’ a dawng.
Union minister of state for Ministry of Corporate Affairs leh Ministry of Road Transport and Highways Harsh Malhotra chu khuallian niin, minister Lalrinpuii hi khualzahawm a ni.
National Summit 2026-a neihah minister Lalrinpuii chuan, Mizoram tana a hnathawh avanga chawimawina an pekah lawmthu a sawi a. He award a dawn theih chhan chu mimal hmalakna ni loin, department officials fel tak takte nena ram leh hnam tana an thawh hona vang a ni tih a sawi.
Mizoram chu India rama CSR fund hmu tlem ber a nih avangin, a bikin sawrkar laipuiin a ngaihpawimawh em em, health & nutrition sector-a thawhho puiah kalkhawmte, corporate hotute chu a sawm a ni.
Mission Viksit Bharat huanga tehfung pawimawh pakhat, health care sector-ah Mizoram Health department-in a thawh that avangte, Universal Health Care System tha tak buatsaih a nih avangte, thingtlangmiten zangkhai leh awlsam zawka ruang an phurh theihna tura Social Walfare-in a ruahman avangte, kum kalta chhungin Mizoram chu India ram state zinga kum khat hnuailam thi zat (infant mortality rate) hniam berna pawl a nih avangte, Mizoram Health Systems Strengthening Project kaltlanga damdawi in thawm that an ni leh sawrkar damdawi in tam takin damdawi in tha (quality) tehna NQAS certificate dawng theia an inhlankai avangin he award hi minister Lalrinpuii hnenah hian hlan a ni.
A ni bakah kawng hrang hranga mi hlawhtling leh entawn tlak thlan chhuah hnenah chawimawina hlan an ni.