Hnathawhnaa thut nasat lutuk

Hnathawhnaa thut nasat lutuk
In office-ah khan i tana thil tha lo deuh a awm, chu chu i thut thinna thutthleng kha a ni. Kha thutthlengah khan i nileng hun tam zawk chu thut nan i hmang a, khatia rei tak tak che sawn lo va i thut khan i taksa hrisel nan pawi i khawih tih i inhre si lo. Hmun thenkhatah chuan office-ah ding chunga hnathawh theihna hmun te an siam tawh a nia. 2015 khan thut (sitting) hi No.1 Lifestyle disease-ah an puang tawh nghe nghe.
Kan thu nasa ve bawk a ni. Office kan thleng a, kan thu nghal a, nilengin thu chungin hna kan thawk a, kan thutna atangin kan tho chhuak tlem hle. Office kan bang a, in-ah kan haw a, TV hmaah kan thu leh a, zanriah ei khamah kan thu leh a. Nilenga kan hun hmanah hian kan thu nasa hle a ni. Hetianga thu chunga hnathawh a, che sawn mang lo a nileng lenga hun kan hman thin hian thau uchuak (obesity) theihna risk a tisang a, tihrawl a tikhawng a, ruh tan a tha lo a, lung (heart) natna risk a tisang a, vein-thrombosis leh thildang risk a tisang nasa hle.
|hut chunga dawhkana hnathawk nasa te an thau duh bik hle a, kan thut hian kan taksaah thau a inchhek khawl a, chu chu mi a tithau (obese) thin.
Mithiam ten zirchianna an neih atanga an hmuh danin nilenga an hun tam zawk thut nan hmang te chuan heart attack neih theihna risk 54%-in an nei sang zawk.
Kan thut nasat lutuk hian glucose level a lo sang a, diabetes risk a tisang thei.
|hut nasat lutuk pawi lehna chu hnungzang ruh a nghawng pawi thei hi a ni. |hut nasat lutuk hian hnungzang ruh na a neih phah theih a, tihrawl a lo khawng mar a, chu chu hnungzang ruh tan a tha lo hle.
Nilenga thut chunga hnathawh hnuah zanlamah nghawng leh dar khamna i nei thin em? Ankylosing spondylitis vang a ni thei, chu chu ruhseh (arthritis) chi khat hnungzang ruh lama thawk chi a ni a, thut nasat avang leh thut dan posture dik tawk loh avangin a awm thei.
Office-a hnathawk i nih a, i hnathawhna hmunah thut a tul si a nih chuan a buaithlak khawp mai, engtin nge i tih tak ang. Nilenga thu ngat ngat lo vin, chawlh lailawk tum hnih tal nei thin a, stretching (zik mar) exrecise ti thin rawh. I bân sir lamah ve ve pharin, a sir zawng (dinglam emaw veilam emaw)in âwn la, pakhat atanga sawm thleng chhiar la, i âwn lohna lam zawkah âwn leh ang che. Chutiang chuan vawi sawm tal ti ang che. I ban chu ngil taka dahthlain, i dar (shoulder) inzawmna ruh chu hnung zawngin ti vir kual ang che. Hetiang hian nilenga thu ngat ngat ringawt lovin chawlh lailawk darkar chanve tal tum hnih nei thin ang che.
I thutna bulah tui in tur in chhawp lo la, tui in turin tho chhuak thin ang che. Office-ah lift a awm a nih pawhin veivah nan lift hmang lovin step-ah kal thin ang che. Peon i tirh kual thinna thenkhatah khan nangmah kal la, i taksa tan thil tha ti i lo ni reng ang. Midang tir kual lo va mahniin a tam thei ang vei kual tum zawk tur a ni. Chhun thingpui te pawh i dawhkana in mai lovin canteen-ah nangmah ngei kalin in zawk la, i taksa tana thil tha ti i ni ang.
Company thenkhat chuan ding chunga hnathawh theihna hmun te an office chhungah an nei tawh a, an hnathawktu te chu thut aia ding chunga hnathawk nasa tur tein an infuih tawh zawk a ni. Hetiang deuh hian ding chunga hnathawh theihna tur remchang insiam thei la a tha hle ang.