Shop & Establishment Act zawma minimum wages hman chu hnathawktute leh a chhawrtute tan a tha lo zawk hle tih sumdawng pawl chuan an sawi a. An dodal zel dawn tih an sawi a ni.
Mizoram Merchant Association (MIMA) chuan Mizoram sawrkarin Shop & Establishment Act hman a tum chu sumdawngte tan tling chi a ni loa, an hnathawktute pawh that loh zawkna tam tak a awm a ni, tiin, state dang pawhin an hman loh laia, keini state-a hman tum chu thil tih chi ah an ngai loa, hman an tum ngai dawn lo tih an sawi.
Minimum wages chungchangah, kum 2016 khan Labour commissioner hoin MIMA, sumdawng pawl hrang hrang, Trade Union ten ngaihtuah hoin, sawrkar hnuaia muster roll-te chauhin hmang se, tiin, inrem a ni a. Chuta tang chuan MR-te hian an hmang char char tih an sawi a. ‘Kan hnam ngaihtuahin Shop & Establishment Act hman hi Mizo mipuiin duh chi ah kan ngai loa, he Act hi mipuiin zirchiangin lo ngaihven turin kan ngen a ni,’ a ti.
India ram state dangah pawh dawrkai proprietorship-ah an hmang hlawm loa, an hriat theih chin leh zawhte pawhin hmang lo turin min duh vek tih MIMA hian an sawi a. Company lian ang chi ah chauh hman chi niin, an hmang a. State dang company lianin an hman aiin Mizoram minimum wages rate hi a sang filawr lak tih an sawi.
-- Advertisement --
He dan hi hmang ta ila : MIMA
# He Acts hman a nih chuan labour-te hamthatna hrang hrang a that em em rualin, he act-in chawlh theihna a pek hi sumdawngte hian kan la tlin rih loh thil a ni. Chawlh an lak kawngah dawr neitute nena inbiakremna awm mai zel hi a tha tawk.
# He dan hi hmang ta ila, a tuar tur chu mipui tho kan ni. Thil man a to phah anga, hnathawk kan neih angte an hlawh a san dawn avangin ban then a, kan chhawr tlem a ngai dawn. Hnathawk kan duh tlem phah lo thei dawn lo.
# Thil bo leh rinawm lohna kawngah hnathawktute an fihlim felfai vek bik loa. Hemi kawngah hian he dan hi a tha lo hle a, sual titu zawk hian a sual a thup theihna chance a sang em em a ni.
# Hnathawktu ban kawngah an sual chung chunga ban mai theih loh na dan hi hman tlakah kan ngai lo. Kan ban a nih chuan zangnadawmna pek ngai zui laite hi a fuh lo. Kan dawrah pawh thuneihna kan nei tlemin sawrkarin kan hnathawkte a humhalhna lama keimahni tana enkawl har khawp dan hi dan tha a ni kan ti thei lo a ni.
# He dan hi hmang dawn ta ila, mi tamzawk hi loan la kan ni a, kan la nghet loin kan sumdawnna tlachhe thuai thei dinhmunah kan la ding hlawm a ni. Labour-te hlawh tur, minimum wages hi state dangte aiin a sang fal hle a. Sumdawngte hian kan tlin lo satliah mai ni loin, thil theihah kan ngai lo.
# Kan hnathawktute zinga a thiam leh a tlingte chu an hlawh a sang hle a. Minimum wages ang hian an hlawh hi siam dawn ila, thawk duh lo tur an awm zawk hial dawn. Sumdawngten thawh tur kan neih mila hlawh kan pek mai zel hi a tha tawk hle a ni.