Hnehna nen a lerah Real tawlh chho

Hnehna nen a lerah Real tawlh chho
Kum 2019 hnu lam La Liga match bika la tlawm zawn ngai lo Real Madrid chu Madrid derby-a an thenawm Atletico Madrid-in an sawp hnuah league-a tlawm zawn pumpelhin Inrinni khan Santiago Bernabeu-ah 3-1-in Villarreal an hneh a, league table-ah Barcelona lehpelin hma an hruai zui nghal.
An kawtkaia mipui 75,216 zet pungkhawm hmaah mualneitu team lamin chawlhlawk hmain goal an khung zo lo a, Atleti laka 5-2-a insawhsil hnaivai an nih bawk avangin La Liga match-a an chak loh zawn hun a herchhuak nge nge mai ang em tih ngaihdan a piang hman thuak awm e!
Real Madrid player-te khelmual chhuahsan tur hi home sopporter rual lungawi lo chuan an lo diriam hman nghe nghe a ni!
Second half boruak erawh a rawn dang ta daih a; minute 47-ah Kylian Mbappe siamsak atangin Brazilian forward Vinicius Junior chuan a goal khatna leh mualneitu team hmahruaina goal khungin, minute 70 khelh tlin hma chiahin a goal hnihna chu penalty atangin Villarreal goalkeeper Arnau Tenas ven goal-ah a chhuihlut leh.
Si hnih an chhuah hnu lawkah Georgia striker Georges Mikautadze chuan Villarreal si phurh pakhat zawk sut thenin, beiseina han nei zui hman thuak dawn mah se minute 77-ah yellow card vawihnihna hmuh vangin Villarreal full-back Santiago Mourino chu Vinicius-a kawr hnunga a pawh chiam avangin a tum hnihna atan yellow card pek a ni a, hnawhchhuah a ni.
A tam zawk an nih hnu minute 81-ah France captain Mbappe chuan mahni hmasial lo zeta Brahim Diaz-a siamsak atangin Madrid goal thumna a thawh ve leh a, Spanish giants tan hlauhthawnna a reh fel taa ngaih a ni!
He match-ah hian England men’s player of the year atana thlanchhuah hlim midfielder Jude Bellingham chuan bench atanga khelmual a luh hnuah goal thun theihna hun remchang hmu mah se Tenas a paltlang zo lo a; a hnu lakawh Mikautadze khan ReaL keeper Thibaut Courtois dan zawh loh goal a thun ve ta a nih kha.
Goal a thun hnuah kephah na avangin Mbappe baichhuak bawk mah se inkhelh ban chak lawmna lamah erawh chuan na han nei awm hmel a pu zui ta chiah lo a, Real fans tan thawk huaina tham a nih ngei a rinawm!
Khelh riata point 21 nei chungin Real Madrid hian an aia game khata khel tlem Barcelona lehpelin La Liga table-ah hma an hruai phawt a, nizan result tarlan hman lohah point hniha hniam rih Catalan team hian Sevilla an hneh chuan an hmahruaina an neikir leh nghal ang.
Point 16 an neih tawh belhchhah zo lo Villarreal erawh 16-naah an thu chhunzawm.