Deutsche Bank Park-a chak nuamsa Bayern

Deutsche Bank Park-a chak nuamsa Bayern
Eintracht Frankfurt khelmual lut reigning champion Bayern Munich chuan Inrinni zanah sithum faiin mualneitu team an sawp a, Bundesliga season thar khelh ruka la chak fai vek chungin table-a an hmahruaina an sawh nghet deuh deuh.
Kum 32 mi Harry Kane chuan Germany rama a goal khung theih chhunzawmin Deutsche Bank Park-ah pawh mikhual team tan goal khat a thawh leh hram a; ti hian, season kal lai inelna hrang hranga match 10 a khelh tawh atangin goal 18 tehreng a tilut tling ta a; a hma chiah chawlhkarah mai khan Europe league lian pali zinga club pakhat tana goal 100 thun tling hmasaber nihna record a lo siam tawh nghe nghe a ni.
Tottenham striker hlui Kane hian tun season league a khelh hmasak vawi ruk atangin goal 11 a khawl tling ta a, Bundesliga season khat chhunga goal 11 thun rang ber a ni nghal bawk.
Inrinni inkhel an thah fel chauh tihah Luis Diaz chuan tan atanga second 15 a herchhuah rualin mikhual hmahruaina goal a thun er zawk a, he goal hi Serge Gnabry siamsak atanga a tihluh a ni a, season kal laia Bundesliga goal lut rang ber a ni.
Darkar chanve khelh tlin dawnah England captain Kane chuan Bayern goal hnihna thunin, goal hmahruai thawhtu Liverpool star hlui Diaz-a siamchhuah a ni.
Second half tawp hma minute ruk la awmah Raphael Guerreiro siamchhuah atangin Colombian left winger Luis Diaz chuan a goal hnihna leh sithum faia mikhual team chakna goal a thawh leh a, Vincent Kompany team-in table-a anmahni hnaihbertu pahnihna Borussia Dortmund lakah point liin hma an hruaifal ta a ni.
Inrinni inkhel dangah Dortmund hian an mikhual RB Leipzig lakah point khat hloh thenin an kawtkaiah 1-1 draw an hlawhchhuak a, tun season league-a draw tum hnih an neihna a ni ta.
League-a a sang pahnih Bayern leh Dortmund-te hi international break zawhah an insu dawn a, inkhel ngaihven hlawh a ni ang.
Eintracht Frankfurt muala inkhel tawp hnaih lamah England international Harry Kane kha hliam avangin lakchhuah a ni a, Kompany bakah England manager Thomas Tuchel-a tan ngaihthatlohna tham a tling ang!
A hnu lawkah Bayern striker Kane chuan ngai a awh chhoh leh mek thu social media lamah tarchhuakin, “Ka han insawhsil deuh mai chauh a ni a, ni reilote hnuah chuan ka zia chho leh mai dawn a, national team tan harsatna awm lo turah ngai ila, Thawhtanniah chuan national team lamah ka in report thei nghal mai ang,” a ti.
Tunkar Ningani hian Wembley friendly match-ah England-in Wales an mikhual dawn a, hei hi October ni 14 World Cup qualifier-a Riga khawpuia Latvia an luhkhung tur inbuatsaihna pakhat a ni.
International break zawhah Bayern Munich hian Borussia Dortmund an mikhual dawn tih tarlan a ni tawh a, Bundesliga title race-a an elpui lian ber nen Allianz Arena-a an innuai hun tur hi October ni 18 niin, a tuk, Pathianni, October ni 19-ah Eintracht Frankfurt pawhin league campaign kal lai chhunzawmin Freiburg an luhkhung ve bawk ang.