Hnehna nena bul tan Sabalenka leh Rybakina

Hnehna nena bul tan Sabalenka leh Rybakina
Nikum French Open semi-final lut Aryna Sabalenka leh Aryna Sabalenka-te’n Roland Garros-ah harsa lo tak ve vein first round an paltlang.
Second seed Sabalenka hian tleirawl kum 19 mi lek Erika Andreeva laka game thum chauh hlohin 6-1 6-2 hnehna nen second round a lut a, ranking-a a aia 98 zeta hniam lakah a chungnung tluanchhuak.
Belarus star Sabalenka hian kumin January thla mai khan Australian Open title a kawl lai humhimin, clay-court grand slam tournament French Open inbuatsain lian pahnih Madrid leh Rome-ah final lut ve ve mah se Iga Swiatek vangin trophy a hlawhchhuak zo lo a, Paris-ah pawh hian a hmawrbawktu pakhat ni leh thei tura beisei niin, Pole bawk hi a harsatna thlentu ni leh tura ngaih a ni!
Khuain a bumro avangin Nilainiah Sabalenka hian bul a tan thei chauh a, dawhthei taka a inkhel nghaktute chungah lawmthu a sawi nghe nghe.
Nimin zing inkhel dangah fourth seed Rybakina pawh hnehna chang zingah tel bawk mah se Belgium nula Greet Minnen lakah bul a tan fuh lo a, set khatnaah 2-0-in a hnufual zet hman a, a hnuah kum 24 mi hian a zawnin game 10 a la a, 6-2 6-3 hnehna nen round hnihna a chuangkai zui ta tho a ni.
Kazakh Rybakina hian kum 2021 khan French Open semi-final lut tawhin, kha kha Roland Garros-a a thlensan ber a la ni a; kumin hian bul a tan tha khawp mai a, Brisbane leh Abu Dhabi-a a champion hnuah April thla khan Stuttgart Open-ah kum kal laia a title pathumna a hlawhchhuak leh a; damlohna avangin Roland Garros inbuatsaihna pakhat Italian Open-ah a title kawl lai humhim turin inlan thei ta lo mah se Paris tournament khel turin a dam a, engemawchen chu thleng thei tura ngaih a ni!
Chuti ang mi chuan second round-ah Dutch player Arantxa Rus a tum leh dawn a; kum 24 mi Rybakina hi kumin bik clay leilunga world number one leh three-times French Open winner ni bawk Iga Swiatek hneh thei awmchhun la niin, April thla Stuttgart title a lakna kawngah Pole hi a hneh ve tawh ngat a ni.
He thu buatsaih lai hian Sabalenka hmachhawn tur la chiang lo deuhin, Spain nula Irene Burillo Escorihuela leh Japanese Moyuka Uchijima inkhela chak zawk zawk an ni ang.
Ti chuan, Sabalenka, Rybakina leh French Open two-time defending champion Swiatek-te hi Paris-a beiseiawm zual pathum niin, anni pathum hian belhkhawmin kuminah WTA title pasarih leh Grand Slam title pakhat an hlawhchhuak tawh!
Alize Cornet tan erawh a playing career tawpna a thleng ve thung a, he Frenchwoman hian a final tournament tura a lo sawilawkah first round paltlang zo loin Chinese seventh seed Zheng Qinwen lakah 6-2 6-1-in a tlawm a, a racket a tung hul ve dawn ta niin a lang.
A zaw na Grand Slam main draw luah tam kawnga women’s Open era record kawltu Cornet hian kum 19 lai professional tennis a lo buaipui tawh chu Court Philippe Chatrier-ah a thlah ve ta a, mipuiin mawihnai takin an thlahliam nghe nghe.
Kum 34 mi hi a tum 20-na atan kumin hian Roland Garros-ah a inlan a, Paris-a a chhuah vawikhatna lai khan tleirawl kum 15 mi lek la niin, major tournament-a a tel vawikhatna a ni nghe nghe.
Zheng-i laka a tlawm hnuah amah mangthatu mipui hmaah thu sawiin, a career phek 20-na a keu thlen ve tak thu leh a phek 21-na atang chuan a hringnunah bung thar a kai ve tawh dawn tih a sawi.
Amah thlahna’na big screen-a a career hlimthla an tarlan laiin WTA title paruk la tling Alize Cornet hian a mittui a dang zo lo a, post-match ceremony-ah hian ngaihhruina trophy an hlan nghe nghe.
Cornet hian a career-ah a zawnin Grand Slam tournament vawi 69 a khel tling a, chumi intanna chu 2007 Australian Open kha a ni.
Major tournament palia tum 72 zet a inlan tawha a thlensanber chu kum 2022 Australian Open quarter-final a luh kha a ni.