Hnehna nena PSG career khar fel Mbappe
Kumin nipui insuan huna Real Madrid player ni tawh tur Paris St-Germain all-time top scorer Kylian Mbappe chuan goal khung zo lo mah se Inrinni zan French Cup final-ah 2-1-in a chhuahsan tur club a chakpui a, domestic double champion nihpui chungin PSG a thlahliam thei.
Olympique Lyonnais laka Luis Enrique team chakna goal hmasa zawk hi minute 22-a Nuno Mendes siamsak atanga Ousmane Dembele tihluh niin, minute 34-ah Fabian Ruiz chuan sihnih faia Ligue 1 champion hmahruaina thawh ve lehin, he goal hi goal line atanga Lyon Irish defender Jake O’Brien-a’n a goal tur a dansak zet hnua a khung zui tak tho a ni.
Lille khelmual Stade Pierre-Mauroy inkhelah hian second half tir lamah kum 23 mi O’Brien chuan Lyon beiseina siamsakin an siphurh pakhat zawk a sut then a, nikum nipui laia Crystal Palace a chhuahsan hnua a goal ngana chiah a ni.
Tun kha PSG kuta Cup title 15 a luh tlinna chiah niin, kum 2021 kha he competition-a an champion vawikhatna a ni a, Cup title la hnem ber nihna record an belhchhah.
Kum 25 mi France forward Mbappe khan goal khung belh zo ta lo mah se kum 2017-a Monaco atanga an lakluh hnu khan game 308 khelin goal 256 a thun tling a, PSG record goalscorer ni chungin a chhuak thei ta tho a ni.
Ligue 1 leh French Super Cup champion PSG-a kum sarih a khawsak chhungin Mbappe hian Ligue 1 title paruk bakah French Cup pali leh League Cup pahnih a lakpui tling.
A kalbo tur hi er tham a tling a, Luis Enrique pawhin ruahmanna fel tak siamin, kum engemawti chhung tlarhma lama an innghahna lian ni reng awm loh huna an buaichhiat mai lohna’n ruahmanna a siam a, PSG league game hnuhnung pasarihah khan vawihnih chiah ‘starting line up’ a chantir a, cup final erawh thlahna hun remchang a ni bawk nen a ‘start’ thung.
Kylian Mbappe ‘farewell match’ tawp rualin a team-mate zawng zawngin an superstar kalbo tur an bawr a, boruakah a vanvawr zawngin an sep bawk.
Mbappe chuan thlahna thu sawiin, “He hun hi tunhnai kum liamta engemawti chhung khan ka lo suangtuah tawh thin a, he hmuna engkim a tawp tawh tur ka ngaihtuah hian ka lungphu hi a su dup thinin ka hria!
“He hmuna ka thil hlawhchhuahte hi khawi hmunah mah ka chharchhuah leh ngai tawh loh turte an ni. Zanin tlai hi a mak a, season ropui kan hmangliam leh thei.
“PSG inkhel en tura naupang an lo punkhawm chhunzawm zel ka beisei a, kan inkhel entute tihphur leh PSG tana khel tura kum naupang zawkte hun remchang siamsak kha kan tum a ni thin. He hmuna hmingchher tura player naupang tam zawk an lo chhuah zel ka beisei,” a ti.
Hnehna nena PSG career khar fel Mbappe
Get real time updates directly on you device, subscribe now.
Prev Post
Next Post