Siamhnuna
Ex-Pastor (Presbyterian)
-- Advertisement --
1. Ngun takin inbuatsaih rawh: Pathian thu hril tur i nih avangin i thupui tur chu thuthlung hlui leh thuthlung tharah eng angin nge a lan? Pathian duh dan eng ang nge tih hre turin inbuatsaih ang che. A tlem berah hapta khat tal inbuatsaihna hun i nei tur a ni. Bible leh thlarau miten thlarau hruaia an lehkhabu ziah te chhiar hram hram zel la, Bible rin chhana i duh dan sawi mai lovin, Pathian duh dan ngei kha sawi lan tum hram rawh. Tunlai hian mi thenkhat ten ni dang aia sakhaw lama an danglam deuh avangin phurna thar an nei deuh pawhin a lang a. Mahse Bible zirtirna tak aiin an mumang thu emaw, an aw hriatna thu emaw, an sawi lar zawk duhin a lang a, an chan kha Kohhran inzirtirna bera hman an duh thin. Pathian chuan mi mal mumang te leh phurna te ai chuan Bible a a thuthlung hi Kohhran hruai nan a hmang zawk tih hriat reng tur a ni. Kan Lal Isua chuan, heng mite zinga te ber pawh titlu chu a nghawngah buh rawtsawmna lung awrh tirin, tuifinriatah thlak se a tan a tha zawk tih thu hi hriat reng tur a ni. Pathian thuthlung awm sa ni lo zawk kawngah mite kaltir a hlauhawm em em a ni.Hetiang hi a nih avangin Bible sikul zir tawh te chuan inbuatsaihna nei lova thu hril hi harsa an ti thin a ni.
2. Thupha chawi suh:
Pathian thu hril tura i din reng rengin pulpit-ah pawh hmun dangah pawh thupha chawi suh. Mipui hmaah i thiam thu leh tlin thu sawi tura koh i ni lo va, Pathian thuchah i neih chu sawi mai rawh.Thupha i chawina chuan mite chunga i chakna tur kha a tichhe thei hle a ni. Thupha chawi tur i neih chuan, i pa a ruka hmu thintu hnenah chuan chawi la, chuti chung pawha tling ngang lova i la inngaih chuan, mi rinawm zawkte hnenah i thusawina tur chanvo chu hlan mai rawh. Kan Lalpa zirtirnaa mak an tih leh mipui a hneh theihna chu thunei taka anmahni a zirtir thin vang a ni.Chuvangin thupha chawi lovin, huai takin i thuchah neih chu puang mai thin ang che.
3. Mawi takin inchei rawh:
I dinna chu khawlai mai mai a ni lo va, bazar pawh a ni lo va, i in lum pawh a ni hek lo va, Lalpa leh a mi thianghlimte hmaa ding i ni a. I silhfen tha ber leh fai ber inbelin, mawi takin Lalpa leh a mite inkarah palai hna chu thawk ang che.Pawn lam lan dan hian chhung lam awm dan a tilang fo tih hre reng la, i hnathawh tur nena innchawlh tawkin inbelin inchei ang che.
4. Fel takin Bible chhiar rawh:
Pulpita i din dawn emaw, mipui hmaa Pathian thu chhiar tur i nih phawt chuan, ngun takin chhiar lo zir lawk la, i chhiar nalh thiam dawn lo a nih phei chuan, en lova tha taka sawi thei turin zir lawk la, zah takin lehkhabu en lovin sawi mai rawh. Tin chhiar thiamte pawhin an thiam avanga thiam lo taka chhiar tlang pawrh pawrh mai tur a ni lo va. Thawnthu a ni lo va, chanchinbu a ni hek lo va, Pathian thu a ni tih hriain zah takin chhiar tur a ni: chhiar zahawm thiam hian ngaihthlaktu te kha nasa takin a hruai thei a ni.
5. Aw hman dan:
Nuin ni sat laia herawta la a herna bulah i awm chuan rei lo teah i mut a chhuak ngei ang. A herawt ri chu a ngai rengin a ri a, sang lai leh hniam lai, ran lai leh muan lai, aw fiak leh aw thum a awm chuang lo va, ri ngaia a rik reng avangin a ngui chein, i mut a chhuak a ni zawk. Chutiang bawkin Pathian thu i sawiin aw pangngai renga i sawi chuan i thu ngaithlatute chu i aw mu ngei ngei dawn a ni tih hre reng la, aw hman dan thiam takin thu hril tum ang che. A changin i uar duh chuan ring deuh sang deuh pawhin sawi tum la, a thu azirin mak ti awm taka hmel lan tir pawh a tul hle thin a ni.
6. Thawnthu emaw, tehkhin thu emaw hmang thin rawh:
Ngaithlatu ten an man theih nan hei hi a pawimawh em em a ni. Entirna tha tak i hman chuan i thu pawh an hre chiang zawk ang a. Tin, mi muthlu tur emaw thu dang ngaihtuah tur emaw pawh an rilru a lak kirsak theih ang a, tin ngun zawkin an ngaithla bawk ang che. I thiam phei chuan nuihza mawi takte pawh han telh lawk thin la, amaherawhchu, tehkhin thu leh entirna atana thawnthu an hriat reng loh nan a tawk deuhva hman a tha ang.Thu hril thiam bera langte chu fiamthu leh tehkhin thu hmang thiamte an ni fo thin a ni.
7. A tawp ber a pawimawh berah chuan i Lalpa a aiawha hnenah tanpuina dil hi theihnghilh hauh suh ang che. Mipuite hnenah eng thu sawi turin nge a duh che zawt la, tanpuina dil ngun em em ang che.