Hnehna nena season bul tan Raducanu

2021 US Open champion a rawn nih nawlh hnua hliam leh natna dang neuh neuhin a tlakbuak chhoh tak reng avanga tournament liana chet fuh tih ni nei tak tak thei ta lo British number two Emma Raducanu chuan nimin khan Australian Open first round chu a season bultannaah hmangin, Russian 26th seed Ekaterina Alexandrova lakah harsa takin 7-6 (7-4) 7-6 (7-2) hnehna a sualchhuak thei hram!
Kum khat chhunga Grand Slam tournament hmasaber atana inbuatsaih kawngah pawh Briton hian harsatna tawk lehin, a hnungzang na avangin warm-up tournament pawh a khel thei lo a, ti chung chuan Australian Open bul a tan a; baseline atangin beilet tha thei viau bawk mah se double fault-in a tibuai hle a, vawiruk ngawt ‘serve’ a hloh!
Kum 22 mi hian a tournament hmachhawn hnuhnung Malaga lama BJK Cup-ah ‘ace’ vawchhuak nual mah se Melbourne Park-ah thung kha chuan double fault tum 15 zet neiin, inkhelh banah a ‘serve’ a thunun thei lo lutuk kha amaha ngaihtuahna hran nei hiala a ngaih thu a sawichhuak!
Raducanu chuan, “Kha ti zat double fault neih mai kha chu awm nawm loh phah rawkna tham a tling ve chiang a, mahse, ka pawm mai a ngai a, tournament bultannain a ken tel hlauhthawn deuhna nen a lo ni ve bawk nen; engpawhnise, ka serve-in hma a sawn theihna’n hian theihtawp ka chhuah mek a ni,” a ti.
World number 61 ni duai tawh Raducanu hian second round-ah amah aia ranking lama tawng sang zawk dang Amanda Anisimova a tum leh ang.
Naktuka Radu hmachhawn leh tur American kum 23 mi Anisimova hi WTA ranking-ah 35-na ni mekin, kum 2023 khan rilru lama harsatna a tawh avangin thla kua zet a chawl a, khelmuala a kirleh hnuah nimin vek khan Australian Open first round khelin, Argentina player Maria Lourdes Carle lakah 6-2 6-3 hnehna a chang a, Briton lakah fiahna lian zawk a hmachhawn dawn a ni.